आज पनि महराको थुनछेक बहस हुँदै

१८ कार्तिक, काठमाडौं । काठमाडौं जिल्ला अदालतमा निवर्तमान सभामुख कृष्णबहादुर महरा विरुद्धको करणीसम्बन्धी कसुरमा हिजोबाट सुरु भएको थुनछेक बहस हिजो नसकिएपछि ‘हेर्दाहेर्दै’ मा आजलाई राखिएको छ ।

जिल्ला न्यायाधीश सुदर्शन पाण्डेको बन्द इजलासमा थुनछेक बहस हिजोदेखि शुरु भए पनि बहस नसकिएका कारण हेर्दाहेर्र्दैमा आजका लागि तय भएको हो । काठमाडौं अदालतका सूचना अधिकारी ज्ञानबहादुर कार्कीका अनुसार निर्वमान सभामुख महराका तर्फबाट बहस गर्ने ३२ जना अधिवक्ताले नाम लेखाएका थिए । तीमध्ये हिजो वरिष्ठ अधिवक्ता लव मैनालीले बहस गरेका थिए। सरकारी पक्षबाट चार जनाले बहस गरेका थिए ।

निर्वतमान सभामुख महराको अदालती बयान शुक्रबार र हिजोका लागि थुनछेक बहस हुने तय भएको थियो । जिल्ला सरकारी वकिलको कार्यालयले महराविरुद्ध करणीसम्बन्धी कसुरमा बिहीबार मुद्दा दर्ता गरेको थियो । महराविरुद्ध मुलुकी अपराध संहिता, २०७४ को दर्ता दफा ३४ को उपदफा ३ बमोजिम मुद्दा दर्ता गरिएको हो । उक्त उपदफामा कसूर गर्न उद्योग गर्ने वा गराउने व्यक्तिलाई त्यस्तो कसुरका लागि तोकिएको सजायको आधा सजाय हुने व्यवस्था छ ।

संसद् सचिवालयकी कर्मचारीलाई बलात्कारको प्रयास गरेको अभियोगमा गत असोज १९ गते काठमाडौं जिल्ला अदालतले महरालाई हिरासतमा राखेर अनुसन्धान गर्न अनुमति दिएको थियो । बहस सकिएपछि महरालाई कारागार पठाउने वा धरौटीमा रिहा हुने भन्ने आदेश हुनेछ ।