महराको थुनछेक बहस सकियो

१८ कार्तिक, काठमाडौं । संसद सचिवलयकी कर्मचारी रोशनी शाहीमाथि जबरर्जस्ती करणी उद्योगको अभियोग लागेका पूर्वसभामुख कृष्णबहादुर महरामाथिको थुनछेक बहस आज सकिएको छ ।

हिजोबाट शुरु भएको थुनछेक बहस केही बेर अगाडि सकिएको हो । बहस सकिएसँगै अदालतले सम्भवतः अबको केही बेरमा नै थुनछेक आदेश जारी गर्ने तयारी गरेकोछ । जबरर्जस्ती करणाी उद्योग मुद्दाको पुर्पक्षका लागि महरालाई साधारण तारेखमा राख्ने, धरौटी तिराएर तारेखमा राख्ने वा र पुर्पक्षमा पठाउने भनेर अदालतले आदेश जारी गर्ने छ ।

थुनछेक बसह सकिनै लाग्दा महरामाथि बलात्कार प्रयासको आरोप लगाउने पीडित महिला समेत काठमाडौं जिल्ला अदालतमा उपस्थित भएकी थिइन् । थुनछेक बहसकै क्रममा महरा पक्षका कानून व्यवसायीहरुले पीडितलाई समेत अदालतमा उपस्थित गराउनुपर्ने जिकिर गरेपछि पीडित महिला शाहीलाई अदालतमा उपस्थित गराइएको प्रहरीले जनाएको छ ।

लगभग १ महिनाको अनुसन्धान पछि महराको गत बिहीबार जिल्ला अदालत काठमाडौंमा मुद्दा दर्ता भएको थियो । काठमाडौं जिल्ला सरकारी वकिल कार्यालयले महराविरुद्ध जबरजस्ती करणी उद्योग र पदीय ओहोदाको दुरुपयोग गरी कसुर गरेको अभियोगमा साढे ७ वर्ष कैद सजाय मागदाबी गरेको छ ।