काठमाडौंसहित देशका १५ कलेज खारेज गर्ने तयारी (सुचीसहित)

२१ कार्तिक, काठमाडौं । काठमाडौंका नाम चलेका भनिएका कलेजहरुलाई सरकारले खारेज गर्ने तयारी गरेको छ । विदेशी निकायहरुबाट सम्बन्धन लिएका नेपालमा संचालनमा रहेका १५ वटा कलेजहरुलाई खारेज गर्ने तयारी भएको छ ।

नेपालको नीति र प्रणलीअनुसार तुरुन्तै खारेज गर्न मिल्ने भएपनि शिक्षा विज्ञान तथा प्रविधी मन्त्रालयले १५ दिनको समय थप गरेको छ । तर मन्त्रालयले समय थप गर्नुको स्पष्ट कारण भने खुलाएको छैन ।

मन्त्रालयले गर्नमिल्ने कामलाई पनि न्यायिक दृष्टिकोणले पहिलोपल्ट प्रक्रिया पूरा गर्न भन्दै १५ दिनको समय दिएको हो । यदी त्यो समयमा प्रक्रिया पूरा नगरेमा खारेज गर्ने शिक्षा, विज्ञान तथा प्रविधी मन्त्री गिरिराजमणि पोखरेलले जनाएका छन् ।

खारेज गर्न लागिएका कलेजहरु :
पेन्टागन एजुकेशन, काठमाडौं
ब्रिज वाटर इन्टरनेशनल, सिनामंगल
वाइल्ड इन्टुच्युड अफ एडभान्स, काठमाडौं
माल्पी इन्टरनेशनल कलेज, काठमाडौं
क्यापिटल कलेज, काठमाडौं
एभेरेष्ट एजुकेशन, काठमाडौं
भ्याली इन्टरनेश्नल कलेज, काठमाडौं
पोलिगन कलेज, काठमाडौं
एपेक्स लाइफ स्कुल, काठमाडौं
साउथ वेस्टन स्टेट कलेज, काठमाडौं
स्काइ इन्टरनेशनल कलेज, बुटवल
वेस्टन मेगा कलेज, बुटवल
वेष्ट्रन विजनेश कलेज, धनगढी
कसमस इन्टरनेशनल कलेज, पोखरा र एउटा कलेजको नाम खुल्न सकेको छैन ।

“हाम्रो प्रणाली अटेरी गरेर सरकारले दिएको समय सीमाभन्दा बाहिर गएमा सरकार बाध्य भएर खारेज गर्ने निष्कर्षमा पग्नेछ,” शिक्षामन्त्री पोखरेलले भने, “नियम विपरित सञ्चालनमा आएका नवीकरण नगरेको र राजस्व समेत नतिरेका लगायत कमजोरी समेत देखिएको छ ।” मन्त्रालयका अनुसार ती कलेजहरुले करिब दुई वर्षदेखि नवीकरण दस्तुर लगायत राज्यलाई तिनुपर्ने विभिन्न दस्तुरहरु बुझाएका छैनन भने विद्यार्थीसँग विभिन्न बहानामा लाखौँ लाख असुलिरहेका छन् ।