राम मन्दिरको पक्षमा सर्वोच्चको फैसला, विवादित जमिन हिन्दुहरूको भएको ठहर

२३ कार्तिक, एजेन्सी । भारतको सर्वोच्च अदालतले अयोध्याको विवादित जमिन हिन्दुहरूको भएको ठहर गरेको छ। राममन्दिर-बाबरी मस्जिद विवादमा शनिबार प्रधानन्यायाधीश रञ्जन गोगोईले फैसला सुनाउँदै मुस्लिम पक्षलाई बेग्लै जग्गा दिनसमेत आदेश गरेका छन्।

अब अयोध्यामा राम मन्दिर बनाउने बाटो खुला भएको छ। सर्वोच्चले सुन्नी मुस्लिम वक्फ बोर्डलाई मस्जित बनाउनका लागि भन्दै पाँच एकड जमिन उपलब्ध गराउन केन्द्र सरकारलाई निर्देशन पनि दिएको छ।

पाँच जना न्यायाधीशहरूले सर्वसम्मत गरेको फैसलामा अबको तीन महिनाभित्र ट्रस बनाउन पनि भनेको छ। फैसलासँगै भारतमा दंगा भड्किन सक्ने भन्दै सुरक्षा अवस्था कडा बनाइएको छ।

केन्द्र सरकारका रक्षामन्त्री राजनाथ सिंहले सर्वोच्चबाट आएको फैसला सन्तुलित भएको प्रतिक्रिया दिएका छन्। उनले फैसलाको स्वागत पनि गरेका छन्।