करको दरप्रति चेम्बरको आक्रोश, मुल्यवृद्धिमा सरकारले नै साथ दिएको आरोप

२६ कार्तिक, काठमाडौं । हिजो प्रकाशित नेपाल राजपत्रको सूचना प्रति नेपाल नेचेम्बर अफ कमर्सले आक्रोश व्यक्त गरेको छ । आर्थिक ऐन २०७६ को प्रावधानमा गरिएको संशोधन प्रति चेम्वरले ध्यानाकर्षण भएको जनाएको छ । आर्थिक ऐन २०७६ लागू भएको चार महिना व्यतित नहुंदै करका दरमा परिवर्तन गर्नुले व्यवसायमा स्थिरता नहुने चेम्बरको ठम्याई छ ।

मुल्यवृद्धिमा सरकारले नै साथ दिएको चेम्बरको आरोप छ । उद्योगी व्यवसायीहरुले आर्थिक ऐन लागू भए पश्चात एक वर्षको लागि आफ्नो व्यवसायीक योजना बनाइ तदनुरुप आफ्नो व्यवसाय संचालन गर्ने र सोही अनुरुप अग्रीम रुपमा कारोवार गरिरहेका हुन्छन ।

उक्त राजपत्र अनुसार कुखुरापालन व्यवसायको लागि आवश्यक पर्ने फुलहरु तथा एक्रेलिक इमल्सनमा दिइएको छुट सकारात्मक छ । व्यापारिक प्रयोजनका लागि पैठारी हुने सुन तथा चाँदीमा प्रति १० ग्राममा लाग्ने महशुल दरमा वृद्धि र विदेशबाट फर्केका यात्रुहरुले आफ्नो साथमा ल्याएको सुन तथा सुनका गहनामा भएको महशुल दरमा भएको वृद्धि तथा कपालमा प्रयोग हुने कस्मेटिक्स, फलाम वा इस्पातको सरसफाइ सम्वन्धी सामान तथा कफीमा लगाइएको अन्तशुल्क वृद्धिले एकातर्फ अनधिकृत व्यापार वृद्धि हुने सम्भावना प्रवल रहने हुन्छ । अर्को तर्फ यसबाट मालवस्तुको मूल्य वृद्धि हुन गई उपभोक्तालाई प्रत्यक्ष रुपमा नकारात्मक असर पर्ने भई महंगीको मारमा पर्ने समेत चेम्बरको ठहर छ ।