मोदी प्रशासनको कारण केसीको १७ औं अनशन तोडियो, के लेखे त खुलापत्रमा ?

२६ कार्तिक, काठमाडौं । स्वास्थ्य क्षेत्रमा सुधारको माग गर्दै अनशनरत प्रा.डा. गोविन्द केसीको १७ औं अनशन भारतीय प्रधानमन्त्री नरेन्द्र मोदी प्रशासनको कारण तोडिन पुगेको छ । आम नागरिकको स्वास्थ्य उपचार प्रति सरकार संवेदनहिन भएको, दलगत स्वार्थका कारण नेपालको स्वास्थ क्षेत्रमा विकृति फैलिएपछि चिकित्सा शिक्षा ऐन संशोधनको प्रमुख माग राखेर उनी डडेल्धुरामा सत्याग्रह बसेका थिए ।

वरिष्ठ चिकित्सक डा. केसीले आफ्नो १७ औँ सत्याग्रह अचानक आज स्थगन गर्नुपरेको छ । मङ्गलबार नवौँ दिनमा केसीले आफ्नो सत्याग्रह स्थगन गरेको घोषणा गरेका छन् । डा. केसीले डडेल्धुराको अमरगढी नगरपालिका–४ बस्ने चार वर्षीय बालक श्रीयान्स जैरुबाट सुन्तलाको जुस खाएर १७ औँ अनशन नवौँ दिनमा स्थगन गरे । राष्ट्रियताको संवेदनशील विषयमा जनस्तरबाट आवाज उठिरहँदा देशवासीको संवेदनालाई ख्याल गर्दै सत्याग्रह स्थगन गरेको उनले विज्ञप्तिमार्फत बताएका छन् ।

प्रा. डा. केसीले स्वास्थ्य र चिकित्सा शिक्षामा सुधार तथा सुशासनका लागि आफ्नो लडाइँ जारी नै रहने स्मरण पत्रकारहरूमार्फत गराएका छन् । सरकारले आफ्नो माग पूरा नगरे पुनः सत्याग्रहसहितका आन्दोलनका कार्यक्रम ल्याउने उनले बताएका छन् । सत्याग्रहकै बीचमा भारतले निकालेको नयाँ नक्सामा नेपालको पश्चिमी सीमा क्षेत्रको लिम्पियाधुरासम्मको भूभाग भारतमा समेटिएको समाचारले अरू नेपाली नागरिकजस्तै आफू पनि स्तब्ध भएको केसीले बताएका छन् ।

“आम नागरिकमा राष्ट्रियताको भावना बलियो हुनु राम्रो हो । तर सत्तामा हुनेहरूले राष्ट्रियताको बहाना पारेर कर्तव्यच्यूत हुने, गलत काम गर्ने तथा फरक मतमाथि दमन गर्नका लागि अभिव्यक्ति स्वतन्त्रता खुम्च्याउने काम गरे भने त्यो स्वीकार्य हुँदैन”, केसीले भनेका छन् । उनले सीमा रक्षा राष्ट्रियताको पहिलो शर्त भएको बताएका छन् ।

हेर्नुहोस् विज्ञप्ति