हिन्दू राज्यको माग गर्दै ७२ घण्टे सत्याग्रह

१ मंसिर,काठमाडौं । नेपाललाई हिन्दू राज्य घोषणा गरी राजतन्त्र पुनस्थापनाको माग गर्दै ७२ घण्टे रिले अनशन सुरु भएको छ । राजधानीको रत्नपार्कमा रहेको शान्ति बाटिकामा यस्तो सत्याग्रह थालिएको छ ।

स्वतन्त्र नागरिक समाजको आह्वानमा थालिएको यो अनशन मंसिर ४ गतेसम्म जारी रहने बताइएको छ । सो अनशनमा शिव सेना नेपालका पदाधिकारीसमेत देखिएका छन् ।

नेपाललाई असफल राष्ट्र हुनबाट जोगाउन र हिन्दू धर्मको संरक्षण गर्न यस्तो कार्यक्रमको आयोजना गरिएको समाजका अध्यक्ष हेमविक्रम सिलवालले बताए ।

कार्यक्रमको आज बिहान उद्घाटन गर्दै सिलवालले नेपाल र नेपालीको हितका लागि हिन्दू राष्ट्र घोषणा गरी राजतन्त्र पुनस्थापना हुनुपर्ने कुरामा जोड दिए ।