मन्त्रिमण्डल पुनर्गठन गर्न ओली छलफल गर्दै

२ मंसिर,काठमाडौं । प्रधानमन्त्री केपी ओली मौजुदा मन्त्रिमण्डल पुनर्गठनको अन्तिम तयारीमा जुटेका छन् । संभव भएसम्म आजै पुनर्गठन गर्ने उनको चाहना छ । यस प्रयोजनका लागि ओलीले अर्का अध्यक्ष पुष्पकमल दाहाल ‘प्रचण्ड’लाई बेलुका बालुवाटार डाकेको स्रोतले बतायो ।

हिजो बसेको सचिवालय बैठकले मन्त्रिमण्डल पुनर्गठन प्रधानमन्त्रीको अधिकार भएकाले उपयुक्त रुपमा सम्पादन गर्न अनुमति दिइसकेको छ । त्यसपछि मन्त्रिमण्डलमा पर्न आकांक्षा राख्नेहरु नेकपाका शीर्ष नेताको घरदैलोमा व्यस्त थिए ।

बहालवाला मन्त्रीहरु पनि आफ्नो मन्त्रालयमा नबसी पद जोगाउन दौडधुपमा व्यस्त थिए । त्यसैले मन्त्रालय आज सुनशान प्राय थिए ।  आज बिहानैदेखि प्रचण्डको निवास खुमलटारमा आकांक्षीहरुको भीड देखिन्थ्यो ।

साथै नेकपाका नेता एवं पूर्वप्रधानमन्त्री माधवकुमार नेपाल पनि आज बिहान प्रचण्ड निवास खुमलटार पुगेका थिए । दुबै नेताबीच नयाँ मन्त्रिमण्डलमा कसलाई पढाउँदा उपयुक्त होला भनेर छलफल भएको बताइन्छ ।

प्रधानमन्त्री ओली सकेसम्म छिटो मन्त्रिमण्डल पुनर्गठन गरी उपचारका लागि अमेरिका जाने मनस्थितिमा छन् । स्रोतका अनुसार आजै बेलुकीसम्म भएपनि पुनर्गठन गर्न आतुर छन् । ओलीले आफू निकटस्थसँग आजै बिहानैदेखि घनिभूत छलफल गरेका छन् ।

वामदेव गौतमलाई उपप्रधानमन्त्रीका रुपमा आउन आज पनि प्रस्ताव गरेका ओलीलाई प्रष्ट जवाफ प्राप्त भैनसकेको बताइएको छ । साँझसम्म गौतमले सकारात्मक जवाफ दिए दोस्रो हैसियतको उपप्रधानमन्त्री बनाउने ओलीको योजना रहेको छ ।