गरिमा विकास बैंकले तीन महिना मै कमायो २६ करोड ९० लाख, खराब कर्जा शुन्यतर्फ लम्कदै

२ मंसिर, काठमाडौं । विकास बैंकहरु मध्य अब्बल मानिदै आएको गरिमा विकास बैंकले चालु आर्थिक वर्षको प्रथम त्रैमासमा १८ करोड ८३ लाख रुपैयाँ खुद मुनाफा आर्जन गर्न सफल भएको छ ।

बैंकले सार्वजनिक गरेको वित्तीय विवरण अनुसार यो नाफा गत आवको सोही अवधिको तुलनामा २१.४२ प्रतिशतले बढी हो । गत आर्थिक वर्षको सोही अवधिमा बैंकले १५ करोड ५४ लाख रुपैयाँ मुनाफा आर्जन गरेको थियो ।

बैंकको वितरणयोग्य मुनाफा भने ६ करोड ३ लाख रुपैयाँ रहेको छ । यद्दपि बैंकको कोषको लागत बढेको छ तर मुनाफामा भने कुनै असर परेको छैन । बैंकले यस अवधिमा २६ करोड ९० लाख रुपैयाँ सञ्चालन मुनाफा आर्जन गरेको छ । गतवर्ष यस्तो मुनाफा २२ करोड २१ लाख रुपैयाँ थियो ।

वित्तीय विवरण अनुसार यस अवधिमा बैंकको खुद ब्याज आम्दानी ६ करोड २१ लाख रुपैयाँले बढेर ४६ करोड ४६ लाख रुपैयाँ पुगेको छ । गतवर्ष यही अवधिमा बैंकको खुद ब्याज आम्दानी ४० करोड २५ लाख रुपैयाँ रहेको थियो ।

बैंकले असोजसम्ममा ३५ अर्ब ९४ करोड रुपैयाँ निक्षेप संकलन गरी ३० अर्ब रुपैयाँ कर्जा प्रवाह गरेको छ । गतवर्ष यही अवधिमा बैंकले ३३ अर्ब १३ करोड रुपैयाँ निक्षेप संकलन गरी २८ अर्ब २१ करोड रुपैयाँ कर्जा प्रवाह गरेको थियो । यो अवधिमा बैंकको खर्च करिब ५ करोड ७६ लाख रुपैयाँले बढेको भएपनि सञ्चालन आम्दानी पनि सोही अनुपातमा बढेको छ । त्यसैगरी बैंकको फि तथा कमिशन आम्दानी पनि एक करोडले बढेको छ।

२ अर्ब ७८ करोड ८३ लाख रुपैयाँ चुक्ता पुँजी भएको बैंकको सञ्चित कोषमा ६३ करोड २० लाख रुपैयाँ रहेको छ । गत आवको सोही अवधिमा बैंकको सञ्चित कोषमा ५१ करोड ७३ लाख रुपैयाँ मात्र थियो ।

चालु आर्थिक वर्षको असोजसम्ममा बैंकको आधार ब्याजदर घटेर ११.२० प्रतिशत कायम भएको छ । गत आर्थिक वर्षको असोजसम्ममा बैंकको आधार ब्याजदर ११.८८ प्रतिशत थियो । यो असोजसम्ममा बैंकको कोषको लागत भने बढेर ८.४८ प्रतिशत कायम भएको छ । यस्तो लागत गत आवको सोही अवधिमा ८.२२ प्रतिशत थियो ।

तर, बैंकको चालु आवको तीन महिनामा खराब कर्जाको अंश भने घटेको छ । यस अवधिमा बैंकको खराब कर्जा ०.३६ प्रतिशत मात्र छ । गत आवको असोजसम्ममा बैंकको खराब कर्जा ०.८४ प्रतिशत थियो ।

चालु आर्थिक वर्षको असोजसम्मको तथ्याङक अनुसार बैंकको प्रतिशेयर आम्दनी २५.१२ रुपैयाँ रहेको छ । गत आवको सोही अवधिमा बैंकको प्रतिशेयर आम्दानी २२.०५ रुपैयाँ थियो । सो अवधिमा बैंकको मूल्य आम्दानी अनुपात ८.६० गुणा रहेको छ ।