नयाँ मन्त्रीको शपथ अपरान्ह् ४ बजे, बीनाको मन्त्री पद जोगियो

४ मंसिर,काठमाडौं । लामो कसरतपछि प्रधानमन्त्री केपी ओली आज मन्त्रिपरिषद पुनर्गठन गर्न अन्तिम कसरतमा छन् ।यस प्रयोजनका लागि अहिले अपरान्ह् १२ बजे सरकारी निवास बालुवाटारमा नेपाल कम्युनिष्ट पार्टीको सचिवालय बैठक बस्दै छ ।

यसअघि आजै बिहान ओलीले अर्का अध्यक्ष पुष्पकमल दाहाल प्रचण्डलाई बालुवाटार बोलाई अन्तिम छलफल गरेका थिए ।
लगत्तै दुवै अध्यक्ष राष्ट्रपति विद्यादेवी भण्डारीलाई भेट्न शितल निवास पुगेका थिए । स्रोतका अनुसार, साँझ ४ बजेका लागि शपथ गराउने कार्यक्रम तय गरिएको छ ।

हिजो साँझ बसेको मन्त्रिपरिषद बैठकमा प्रधानमन्त्री ओलीले सबै मन्त्रीलाई यसबारे जानकारी दिएका थिए । स्रोतका अनुसार, अहिले सात जना मन्त्री हटाइने भएका छन् ।

जसमा पूर्वमाओवादीका तर्फबाट उद्योगमन्त्री मातृकाप्रसाद यादव, कृषि तथा पशुपंक्षी मन्त्री चक्रपाणि खनाल रहेका छन् भने पूर्व एमालेका तर्फबाट सामान्य प्रशासन मन्त्री लालबाबु पण्डित, श्रम तथा रोजगार मन्त्री गोकर्ण विष्ट, महिला, बालबालिका तथा जेष्ठ नागरिक मन्त्री थममाया थापा लगायत परेका छन् ।

प्रधानमन्त्री ओलीले हटाउन चाहेका खानेपानी मन्त्री बीना मगरको जागिर जोगिएको स्रोतले बतायो । प्रचण्डकी बुहारी बीनालाई जोगाउन उनले ठूलै शक्तिको प्रयोग गरेका थिए । तर बीनाको मन्त्रालय भने फेरिएको बताइएको छ ।

नयाँ मन्त्री बन्नेमा केही चर्चित र स्वच्छ छविको भनिएका पनि परेको स्रोतको दावी छ । जसमा घनश्याम भूषाल, सुरेन्द्र पाण्डे लगायत रहेका छन् ।