जति दिन श्रममन्त्रीको रुपमा रहेँ : गोकर्ण विष्ट

५ मंसिर काठमाडौं । श्रम, रोजगार तथा सामाजिक सुरक्षा मन्त्रीबाट हटाइएका गोकर्ण विष्टले जति दिन श्रममन्त्रीको रुपमा आफू रहेँ ती दिनहरुमा वैदेशिक रोजगारीको नाममा ठगीमा परेका युवाको पक्षामा इमान्दारीपूर्वक काम गरेको बताएका छन् ।

बिहीबार नवनियुक्त मन्त्री रामेश्वर राय यादवलाई बधाई दिन मन्त्रालय पुगेका विष्टले पसिनाको मूल्य नपाएका श्रमिक र बेरोजगार युवाको पक्षमा इमान्दारीपूर्वक काम गरेको पनि बताए ।

यादवलाई बदाई दिए लगतै सामाजिक सञ्जाल फेसबुकमा पनि उनले आफ्नो स्टाटस लेख्दै भनेका छन्, ‘अहिले मन्त्रीबाट बाहिरिएको छु । थप उर्जा र प्रेरणाका साथ । मन्त्रीको रुपमा काम गर्ने अवसर प्रदान गर्ने सम्मानीय प्रधानमन्त्रीज्यूप्रति कृतज्ञ छु ।

सुधार अभियानमा साथ दिने सहयोगी, शुभचिन्तक एवं सबै दाजुभाइ दिदीबहिनीहरुलाई हार्दिक धन्यवाद !’ उनले भने । नवनियुक्त श्रम यादवलाई स्वागत गर्न विष्ट निजी गाडी चढेर आएका थिए ।