प्रधानमन्त्रीज्यू, बुढीगण्डकीमा राष्ट्रघात किन ?

९ मंसिर काठमाडौं । प्रमुख प्रतिपक्षी दल नेपाली कांग्रेसले राष्ट्रिय गौरवको आयोजनाका रुपमा रहेको बूढीगण्डकी जलविद्युत् आयोजना निर्माणमा भइरहेको ढिलाईप्रति चासो व्यक्त गरेको छ ।

यहि मंसिर १४ गते हुने उपनिर्वाचनलाई केन्द्र बनाएर सरकारले गरेका काम कार्बाहीका बारेमा सामाजिक सञ्जाल फेसबुकमार्फत कांग्रेस प्रवक्क्ता विश्वप्रकाश शर्माले प्रधानमन्त्री केपी शर्मा ओलीको सरकारलाई प्रधानमन्त्री ज्यू, बुढीगण्डकीमा राष्ट्रघात किन ? भन्दै खबरदारी गरेका हुन् ।

आयोजनाको मुआब्जा निर्धारण हुन बाँकी रहेका धादिङको खहरे बजार क्षेत्र र गोरखाको आरुघाट, आर्खेतलगायत का स्थानीयवासीले असन्तुष्टि व्यक्त गरिरहेको र आयोजना कुन ढाँचामा निर्माण गर्ने भन्नेसम्बन्धी कुनै पनि निर्णय नभएकाेमा सो पार्टीले चासो व्यक्त गरेको हो ।

कांग्रेसका प्रवक्ता शर्माले एक हजार २०० मेगावाट क्षमताको सो आयोजनामा भइरहेको ढिलाईले आफूहरुलाई समेत संवेदनशिल बनाएको बताए । आयोजानका लागि रकम जोहो गर्ने भन्दै सरकारले भन्सार बिन्दुमा नै डिजेल र पेट्रोलमा प्रतिलिटर रु पाँच पूर्वाधार कर लगाएको छ । सो करबाट कात्तिक मसान्तसम्म रु ३८ अर्ब रकम जम्मा भएको छ ।

कांग्रेसले बिनाप्रतिस्पर्धा एक विवादास्पद कम्पनीलाई आयोजना निर्माणको जिम्मा दिइएको र हालसम्म काम नै शुरु नभएकाेमा समेत गुनासो गरेको छ । नेपाल आफैँले निर्माण गर्न जरूरी र सम्भव ठहर गरिएको सो परियोजना लामो समयसम्म अलपत्र पर्नु दुर्भाग्यपूर्ण रहेको कांग्रेसको टिप्पणी छ ।

नेपाली आफैँले बनाउन सक्ने ठहरका साथ अघि बढाउने सङ्कल्प गरिएको र रकमको बन्दोबस्त गर्ने गरि अघि बढिसकेको अवस्थामा आयोजनाको भविष्य के हुन्छ भन्ने प्रश्नसमेत कांग्रेसले गरेको छ । प्रवक्ता शर्माले सरकारलाई खबरदारी संगै सोधेका छन् , “अब समग्रमा बूढीगण्डकीको भविष्य के हुन्छ ?”