बढ्दो धपेडी घट्दो स्वास्थ्य

१० मंसिर काठमाडौं । प्रधानमन्त्री केपी शर्मा ओली आज फेरि अस्पताल भर्ना भएका छन् । आजको समस्या भने नियमित भन्दा पृथक छ । एपेन्डिसाइटिसले पिरोलेपछि उनी आज विहानै अस्पताल पुगेका हुन् ।

जाँचपड्तालपछि उनको पेटमा एपेन्डिसाइटिसले सताएको पत्ता लाग्यो । अनि तत्कालै शल्यक्रिया गर्ने निर्णय गरियो । अचेल प्रधानमन्त्री ओलीको अस्पताल आउजाउ निकै बढेको छ । हप्ताको दुई पटक जस्तो त उनको मृगौलाको डायलासिस नै गर्नुपर्छ ।

डाइलासिस गर्दा कम्तिमा पाँच घण्टा अस्पतालको बसाई हुन्छ । आते जाते गर्दा लगभग सात घण्टा त एकपटकको डाइलासिसमा खर्च हुने गरेको छ । मृगौलाले काम गर्न छाडेपछि शरीरका अरु अंगप्रत्यङ्गले पनि क्रमश काम गर्न नसक्ने हुन्छ । त्यसैको सुरुआत भएको त हैन ? यस्ता प्रश्न उब्जनु स्वभाविक हो ।

देशको कार्यकारी प्रमुखको अधिकांश समय अस्पतालको चक्कर लगाउँदै वित्ने स्थिति आयो भने सुखी नेपाली समृद्ध नेपालको नाराको के हविगत होला ?  नेपाली जनताको दुई तिहाई समर्थन प्राप्त ओली सरकार निकम्मा भयो भन्ने आरोप सबैतिरबाट लागेको अवस्था छ ।

हुन पनि सरकारले अहिलेसम्म नेपाली जनताको मनमा केही हुन्छ र हुँदैछ भन्ने विश्वास दिलाउन सकेको छैन । लगभग दुई वर्षको अवधि त अहंकार र दम्भमा नै वितायो ओली सरकारले । सबैतिरबाट चर्काे आलोचना हुन थालेपछि भने अहिले मन्त्रिमण्डल पुनर्गठन गरेर जनताको ध्यान अन्यत्रै मोड्ने प्रयत्न गरिएको छ ।

गत साता मन्त्रिपरिषद पुनर्गठन गर्दा पनि ओलीले विवेक बन्धकी राखेको भन्दै आफ्नै पार्टी पंक्तिबाट बढी विरोधको स्वर सुन्नु परेको छ । पाँच वर्ष प्रधानमन्त्री पद जोगाउन ओलीले गएको साता राष्ट्रपति विद्यादेवी भण्डारीलाई साक्षी किनारा सदर भन्दै पार्टी अध्यक्षको कार्यकारी अधिकार अर्का अध्यक्ष पुष्पकमल दाहाल प्रचण्डलाई सुम्पिएका छन् । जबकि अहिले उनको स्वास्थ अवस्था एकदमै नाजुक छ ।

जब जब उनको स्वास्थ कमजोर बन्छ , त्यही बेला उनी दुनियाँलाई देखाउन अझ बढी सकृय हुन थाल्छन् । यसले ओलीको स्वास्थ्य अझै जोखिममा पर्ने चिकित्सकहरुको भनाई छ । तर ओली प्रधानमन्त्री पद जोगाउन चिकित्सकको राय सुझावलाई धोती लगाउन उद्यत छन् ।

चाहिने भन्दा बढी धपेडी लिएकाले नै प्रधानमन्त्रीको स्वास्थ अझै खस्कन गएको छ – नाम बताउन नचाहने एकजना चिकित्सक भन्छन् ,अहिले एपेन्डिसाइट बढेको पनि त्यही अनावश्यक धपेडीले हो । मृगौलाले काम गर्न छाडेपछि शरीरका अन्य अंग पनि कमजोर हुने भएकाले नै यतिखेर नै एपेन्डिसाइट बढेको हो – उनले भने । तर ओली भने बाँकी तीन वर्षको अवधि जसरी भएपनि प्रधानमन्त्रीका रुपमा बिताउने ध्याउन्नमा छन् ।

त्यसका लागि उनले यो उमेरमा समेत दोस्रो पटक भएपनि मृगौला प्रत्यारोपण गर्ने मनस्थिति बनाएका हुन् । संभवतः यही महिनाको अन्त्यसम्म उनी उपचारका लागि अमेरिका जाने छन् । सरकारी नियुक्तिका केही काम पूरा गर्नपर्ने भएकाले उनी रोकिएका हुन्, ओली निकट स्रोतको भनाई छ । खासगरी रिक्त संवैधानिक निकायका पदाधिकारी पदपूर्ति गरेपछि भने ओली लामो विदामा बस्ने गरी उपचारमा रहने भएका छन् ।

त्यसका लागि उनले संवैधानिक परिषद ऐनको मौजुदा व्यवस्थामा परिर्वतन गर्न चाहेका छन् । बहुमतले पदाधिकारी नियुक्त गर्न मिल्ने गरी ऐनमा संशोधन गरी पारित गर्न उनले अध्यादेश तयार गरेका छन् । उक्त अध्यादेश लालमोहर लगाउन अहिले राष्ट्रपति कार्यालय पठाइएको छ ।

स्रोतका अनुसार , राष्ट्रपतिले उक्त अध्यादेश चाँडै नै स्वीकृत गरी लालमोहर लगाउने अन्तिम तयारीमा छन् । आगामी साता हुने उपनिर्वाचन लगत्तै अध्यादेशमा लालमोहर लगाउने तयारी भएको छ । उक्त अध्यादेशले लोकतन्त्रको हुर्मत लिने भन्दै प्रमुख प्रतिपक्षी दल नेपाली कांग्रेस लगायत संविधानका जानकार भने विरोधमा उत्रिएका छन् ।

प्रधानमन्त्री ओली भने अध्यादेशमा लालमोहर लाग्ने वित्तिकै बहुमतका आधारमा आफ्ना आसेपासेलाई संवैधानिक आयोगमा नियुक्ति दिने कसरतमा जुटेका छन् ।