प्रहरी निरीक्षक हुँ भनी पैसा असुली गर्न खोज्ने पक्राउ

१२ मंसिर काठमाडौं । बर्दिया जिल्लाका विभिन्न स्थानमा ‘लैंगिक हिंसा बिरुद्धको १६ दिने अभियान” अन्तर्गत लैंगिक हिंसा न्यूनिकरण सम्बन्धी सचेतनामूलक कार्यक्रम बुधबार सम्पन्न भएको छ ।

जिल्ला प्रहरी कार्यालय बर्दिया तथा मातहतका कार्यालय, समुदाय प्रहरी वडा समिति, समुदाय प्रहरी टोल समितिको संयुक्त आयोजना तथा बर्दिया जिल्लामा क्रियाशील महिला अधिकारको क्षेत्रमा काम गर्ने विभिन्न संघ-संस्थाहरुको सहकार्यमा उक्त सचेतनामूलक कार्यक्रम सञ्चालन गरिएको हो ।

कार्यक्रममा स्थानीय जनप्रतिनिधिहरु, स्थानीय तहका महिला बालबालिका तथा जेष्ठ नागरिक शाखाका प्रमुख तथा प्रतिनिधिहरु, शिक्षक, बिद्यार्थी, समाजसेवी, स्थानीय भद्रभलादमी, नागरिक समाज, स्थानीय संचारकर्मी, महिला संजाल लगायत सरोकारवाला निकायका प्रतिनिधिहरुको उपस्थिति रहेको थियो ।

कटुवा पेस्तोल सहित पक्राउ

उदयपुरको  बेलका नगरपालिका-३ सातपत्रेबाट कटुवा पेस्तोल १ थान र सोको गोली १ राउण्ड सहित सोही नगरपालिका बस्ने १९ वर्षीय मनोज खत्रीलाई बुधबार राति प्रहरीले पक्राउ गरेको छ ।

निज खत्री र सोही नगरपालिका बस्ने २६ वर्षीय बिशाल लिम्बुले स.१ त ७४४० नम्बरको ट्याक्टर रोकी ट्याक्टरमा काम गर्ने एक व्यक्तिलाई हातपात गर्दै कटुवा पेस्तोल समेत देखाई अपहरण शैलीमा एकान्त स्थानतर्फ लैजाँदै गरेको भन्न खबर प्राप्त हुनासाथ ईलाका प्रहरी कार्यालय रामपुरठोक्सिलाबाट खटिएको प्रहरीले खत्रीलाई उक्त हतियार सहित पक्राउ गरेको हो ।घटनामा संलग्न फरार रहेका बिशाल लिम्बुको खोजी गर्नुका साथै यस सम्बन्धमा प्रहरीले आवश्यक अनुसन्धान गरिरहेको छ ।

प्रहरी निरीक्षक हुँ भनी पैसा असुली 

यस्तै पर्सा जिल्ला प्रहरी कार्यालय पर्साको क्राइम ब्रान्चको प्रहरी निरीक्षक हुँ भनी पैसा असुली गर्न खोजेको अभियोगमा वीरगंज महानगरपालिका-५ बस्ने २७ वर्षीय दिब्यप्रकाश चतुर्वेदीलाई बुधबार बिहान प्रहरीले पक्राउ गरेको छ ।

चतुर्वेदीले मकवानपुर हेटौंडा उपमहानगरपालिका-९ बस्ने एक व्यक्तिलाई प्रहरी हुँ भन्दै हप्काई पैसा मागेको भन्ने खबर प्राप्त हुनासाथ जिल्ला प्रहरी कार्यालय पर्साबाट खटिएको प्रहरीले उनलाई पक्राउ गरेको हो । साथै चतुर्वेदी हातहतियार खरखजना कसुरमा २०७५ चैत ३० गते जिल्ला अदालत पर्साको आदेशले १ लाख रुपैयाँ धरौटीमा छुटेको व्यक्ति भएको जिल्ला प्रहरी कार्यालय पर्साले जनाएको छ ।

जबरजस्ती करणी गरेको अभियोगमा पक्राउ

कञ्चनपुरमा  १४ वर्षीया बालिकालाई जबरजस्ती करणी गरेको अभियोगमा बेलौरी नगरपालिका-८ कानपुर बस्ने २९ वर्षीय धनीराम चौधरीलाई मंगलबार राति प्रहरीले पक्राउ गरेको छ । चौधरीले ती बालिकालाई ललाई फकाई जबरजस्ती करणी गरेको भन्ने खबर प्राप्त हुनासाथ प्रहरी चौकी पचुईबाट खटिएको प्रहरीले उनलाई पक्राउ गरेको हो ।

छुट्टाछुट्टै सवारी दुर्घटनामा परी २३ जनाको मृत्यु

अर्घाखाँची र हुम्लामा भएका छुट्टाछुट्टै सवारी दुर्घटनामा परी २३ जनाको मृत्यु भएको छ । अर्घाखाँची, सन्धिखर्क नगरपालिका-६ सल्लेरीस्थित सन्धिखर्क-बुटवल सडक खण्डमा सन्धिखर्कबाट बुटवलतर्फ जाँदै गरेको लु.२ ख २१४८ नम्बरको बस सडकबाट अन्दाजी ३ सय मिटर तल खसेर बुधबार दिउँसो दुर्घटना हुँदा १९ जनाको मृत्यु भएको छ । दुर्घटनामा १७ जनाको घटनास्थलमै मृत्यु तथा १ जनाको प्राथमिक स्वास्थ्य केन्द्र ठाडा र १ जनाको चौराहा हस्पिटल बुटवलमा उपचारको क्रममा मृत्यु भएको हो ।

मृतकमध्ये ११ जनाको सनाखत भएको र बाँकी ८ जनाको सनाखत कार्य भइरहेको छ । साथै दुर्घटनामा घाइते भएका १६ जनामध्ये ६ जनाको चौराहा हस्पिटल, ९ जनाको भैरहवा मेडिकल कलेज र १ जनाको बिएण्डबी अस्पताल ललितपुरमा उपचार भइरहेको छ ।

हुम्ला, सिमिकोट गाउँपालिका-७ लाग्नास्थित सडकमा लु.४ ख ३२६९ नम्बरको टिपर अनियन्त्रित भई बुधबार दिउँसो दुर्घटना हुँदा टिपरमा सवार ४ जनाको मृत्यु भएको छ । दुर्घटनामा टिपरमा सवार नाम्खा गाउँपालिका-१ हेप्का बस्ने ४६ वर्षीया छिरिङ कर्मा तामाङ, ३५ वर्षीया नरी लामा र खार्पुनाथ गाउँपालिका-१ प्युसा बस्ने १९ वर्षीय बबरजंग शाहीको घटनास्थलमै मृत्यु हो भने गम्भीर घाइते भएका सिमिकोट गाउँपालिका-६ सिमिकोट बस्ने ५८ वर्षीय भक्त बहादुर रोकायको जिल्ला अस्पताल सिमिकोटमा उपचारको क्रममा मृत्यु भएको हो ।

साथै दुर्घटनामा घाइते भएका टिपर चालक समेत अन्य १२ जनाको सोही अस्पतालमा उपचार भइरहेको छ । दुर्घटनास्थलमा तत्काल खटिएको स्थानीय प्रहरीले आवश्यक उद्दार कार्य गर्नुका साथै यस सम्बन्धमा आवश्यक अनुसन्धान गरिरहेको छ ।

विभिन्न धनमाल चोरी

काठमाडौंको चन्द्रागिरी नगरपालिका-१५ तिनथाना डेरा गरी बस्ने उदयपुर त्रियुगा नगरपालिका-घर भएका गोमा खतिवडाको कोठाबाट नगद तथा सुनका बिभिन्न गरगहना समेत गरी करिब ३ लाख ४० हजार रुपैयाँ बराबरको धनमाल बुधबार दिउँसो चोरी भएको छ ।

यसैगरी काठमाडौं महानगरपालिका-३ महाराजगंज बस्ने अनध सिद्धि मानन्धरको घरबाट नगद २ लाख ३० हजार रुपैयाँ बुधबार राति चोरी भएको छ । चोरीमा संलग्न फरार व्यक्तिहरुको खोजी गर्नुका साथै यस सम्बन्धमा स्थानीय प्रहरीले आवश्यक अनुसन्धान गरिरहेको छ ।

आगलागीबाट विभिन्न धनमाल जलेर नष्ट

बारा, निजगढ नगरपालिका-१२ स्थित रतनपुर-कुलिया सडक खण्डमा बाटो बनाउन राखेको अलकत्राको मेशिनमा काम गर्ने क्रममा बुधबार साँझ आगलागी हुँदा करिब २२ लाख रुपैयाँ बराबरको धनमाल नष्ट भएको छ ।

कपिलवस्तु, बाणगंगा नगरपालिका-४ गजेडास्थित सडकमा तौलिहवातर्फ ग्यालेनमा मट्टितेल बोकी जाँदै गरेको लु।२३ प २८३४ नम्बरको मोटरसाइकलमा मट्टितेल पोखिन गई बुधबार साँझ आगलागी हुँदा उक्त मोटरसाइकल जलेर पूर्ण रुपमा नष्ट भएको छ ।

साथै उक्त आगोमा परी घाइते भएका मोटरसाइकल चालक सोही ठाउँ बस्ने ५३ वर्षीय कमल अधिकारी र उनकै छोरा २५ वर्षीय सन्तोष अधिकारीको सिएनसि अस्पतालमा उपचार भइरहेको छ । स्थानीय बासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा प्रहरीले आवश्यक अनुसन्धान गरिरहेको छ ।