उत्तरी हुम्लामा हिमपात सुरु

१३ मंसिर हम्ला । उत्तरी हुम्लामा बिहीबार बेलुकाबाट हिमपात सुरु भएको छ । बिहानैबाट बाक्लो बादल लागेर चिसो अत्यधिक बढेको भए पनि बेलुकाबाट हिमपात सुरु भएको हो ।

राति ८ः०० बजेबाट हिमपात सुरु भएको प्रमुख जिल्ला अधिकारी विनीता भट्टराईले जानकारी दिइन। यसअघि पहिलो पटक हिमपात हुँदा पानी पर्ने गरेको भए पनि यसपालि भने सीधै हिउँ पर्न सुरु गरेको छ । हिउँ बाक्लो रूपमा पर्न सुरु भएको छ । सिमकोटमा यसपालि पहिलो हिमपात हो । यसअघि अग्ला डाँडासम्म हिउँ जम्न सुरु भएको थियो ।

हिमपातपछि तापक्रम माइनस पाँच डिग्री पुगेको छ । चिसो भने दिउँसैबाट बढेको थियो । यो हिमपात जिल्लाको माथिल्लो क्षेत्रमा बढी भएको छ ।

विशेष गरी अग्ला क्षेत्रहरू सिमकोट गाउँपालिकाको रलिङ, पञ्चमुखी, चाङ्ला हिमालमा बढी हिमपात भएको छ भने नाम्खा गाउँपालिकाका सबै क्षेत्रमा हिमपात भएको छ ।