प्रधानमन्त्री ओली खतरामुक्त

१३ मंसिर काठमाडौं । एपेन्डिसाटिसको शल्यक्रिया गरेर थलिएका प्रधानमन्त्री केपी शर्मा ओलीको स्वास्थ्यमा आएको सुधारलाई चिकित्सकहरुले सकारात्मक संकेत भनेका छन् ।

गत मंगलबार त्रिभुवन विश्वविद्यालय शिक्षण अस्पताल महाराजगञ्जमा गरिएको शल्यक्रियापछि उत्पन्न अन्योल विस्तारै समाप्त भएको बुझाई उपचारमा संलग्न चिकित्सकहरुको रहेको छ । शल्यक्रिया गरेको पर्सिपल्ट अर्थात हिजो विहिबारदेखि नै प्रधानमन्त्रीको स्वास्थमा अपेक्षाकृत सुधार भएकोमा चिकित्सकहरुले सन्तोष प्रकट गरेका छन् ।

आज विहान अस्पतालमा आयोजित पत्रकार सम्मेलनमा ओलीको उपचारमा संलग्न चिकित्सकहरुले अब प्रधानमन्त्री खतरामुक्त रहेको बताए । प्रधानमन्त्रीका निजी चिकित्सकका रुपमा कृयाशील डा. दिव्यासिंह शाहले अब विस्तारै काम गर्न ओली सक्षम हुने बताइन् ।

साथै प्रधानमन्त्रीको मृगौलाको डाइलासिस पनि नियमित रुपमा गर्न मिल्ने जानकारीसमेत उनले दिइन् । डा. शाहका अनुसार केही समयपछि प्रधानमन्त्रीको दोस्रो पटक मृगौलाको प्रत्यारोपण गर्ने तयारी भइरहेको छ ।

यही रुपमा सुधार भयो भने केही समयपछि नै हामी प्रधानमन्त्रीको ओलीको दोस्रो पटक मृगौला प्रत्यारोपण गर्न सक्ने छौ ।
प्रधानमन्त्री ओलीले सामान्य खाना खाने र हिंडडुल गर्न सक्ने उनले बताइन् । यस्तै अर्का चिकित्सक डा. अरुण सायमीका अनुसार अब एक साताको आरामपछि प्रधानमन्त्री पहिले जस्तै काममा फर्कन सक्ने छन् ।