उपनिर्वाचन : कहाँ-कति प्रतिशत मतदान भयो ?

१४ मंसिर पोखरा । कास्की क्षेत्र नं २ मा शनिबार प्रतिनिधिसभा सदस्य पदको निर्वाचन शान्तिपूर्ण ढङ्गले सम्पन्न भएको छ ।

कास्की क्षेत्र नं २ का लागि ८२ वटा मतदानकेन्द्रमा भएको निर्वाचनमा ६५ प्रतिशत मतदान भएको प्रारम्भिक अनुमान रहेको जिल्ला निर्वाचन कार्यालय, कास्कीका प्रमुख महेन्द्रराज सुवेदीले जानकारी दिए ।

मतदान सम्पन्न भइसकेपछि मतपेटिका मतगणनास्थलमा ल्याउने काम शुरु भइसकेको छ । शहीद चोकस्थित जिल्ला समन्वय समितिको सभाभवनमा सबै मतदान केन्द्रबाट मतपेटिका आइसकेपछि आज राति १० बजेदेखि मतगणना शुरु हुने सहायक मतदान अधिकृत रामचन्द्र उपाध्यायले जानकारी दिनुभयो । सबै मतपेटिका प्राप्त हुनासाथ सर्वदलीय बैठक आह्वान गरी मतगणना शुरु गरिने उनले बताए।

मतगणनास्थलको सुरक्षाका लागि दुई वटा सिसी क्यामेरा जडान गरिएको छ भने बाहिरबाट तार जालीले घेरिएको छ । उम्मेदवारको प्रतिनिधिले गणनामा कुनै पनि बाधा अवरोध पु¥याउन नपाउन् र गैरकानूनी कार्य रोक्नका लागि तारबार लगाइएको बताइएको छ । दुई स्थानबाट गणना शुरु गर्ने योजना रहेको बताइएको छ ।

दलको तर्फबाट उम्मेदवार बनेकाका दुईजना र स्वतन्त्र उम्मेदवारका एक जना प्रतिनिधि मात्र गणनास्थलमा रहन पाउने व्यवस्था गरिएको छ । उपनिर्वाचनमा विभिन्न १० राजनीतिक दल तथा स्वतन्त्र ११ गरी २१ उम्मेदवार चुनावी प्रतिस्पर्धामा छन् ।

सखुवा प्रसौनीमा ८२ दशमलव ६१ प्रतिशत मत खस्यो

वीरगञ्ज : पर्साको सखुवा प्रसौनी गाउँपालिका–५ मा आज भएको वडाध्यक्षको उपनिर्वाचनमा ८२ दशमलव ६१ प्रतिशत मत खसेको छ ।

कूल दुई हजार ६०२ मतदाता रहेको सो क्षेत्रमा दुई हजार १२८ जनाले मतदान गरेको पर्सा प्रमुख जिल्ला अधिकारी नारायणप्रसाद भट्टराईले बताए । एक हजार २११ पुरुष तथा ९१७ महिलाले मतदान गरेका छन्। आज बेलका ९ बजेबाट नै मतगणना शुरु गरिने उहाँले जानकारी दिए ।

चितवनमा ७६ प्रतिशत मतदान

चितवन :  चितवनको तीन वटा वडामा शान्तिपूर्ण रुपमा निर्वाचन सम्पन्न भएको छ । ती वडामा ७५ दशमलव ९७ प्रतिशत मत खसेको छ ।

भरतपुर महानगरपालिका–१६ र खैरहनी नगरपालिकाको वडा नं ४ र ५ मा मतदान भएको हो । जिल्ला निर्वाचन अधिकारी हरिप्रसाद ढकालका अनुसार तीन वटा वडामा कूल मतदाता १३ हजार २८४ रहेकोमा १० हजार ९२ मत खसेको छ । भरतपुर महानगरपालिका–१६ मा आठ हजार ४८१ मतदाता रहेकोमा छ हजार २५० मतदान भएको छ । त्यहाँ ७३ दशमलव ६९ प्रतिशत मत खसेको छ ।

खैरहनी नगरपालिका–४ मा दुई हजार ६९२ मतदाता रहेकोमा दुई हजार १७२ मतदान भएको छ । यो कूल मतदानमध्ये ८० दशमलव ६८ प्रतिशत हो । त्यस्तै खैरहनी–५ मा दुई हजार १११ मतदाता रहेकोमा एक हजार ६७० अर्थात ७९ दशमलव १० प्रतिशत मतदान भएको छ । निर्धारित समयमा नै ती वडाका मतदान केन्द्रहरुमा मतदान शुरु भएको थियो ।

जिल्लामा ६ वटा मतदानस्थल र १५ वटा केन्द्र रहेका थिए । मतपत्र सङ्कलन भइसकेको जिल्ला निर्वाचन अधिकारी ढकालले जानकारी दिए ।

भरतपुर महानगरपालिका–१६ को भरतपुरस्थित चितवन जिल्ला अदालत परिसरमा रहेको मुख्य निर्वाचन अधिकृतको कार्यालयमा र खैरहनीको पुरानो नगरपालिका भवनमा निर्वाचन अधिकृतको कार्यालयमा सर्वदलीय बैठक पश्चात् आजै मतगणना शुरु गरिने ढकालले बताए ।  जिल्लाका तीन वटा वडामा पाँच राजनैतिक दलका १३ जना उम्मेदवार चुनावी मैदानमा रहेका छन् ।

भक्तपुर : प्रदेशसभा सदस्य हरिशरण लामिछानेको निधन भएपछि भक्तपुरको निर्वाचन क्षेत्र नम्बर १ (क) मा भएको प्रदेशसभा पदका लागि भएको निर्वाचनमा ७० प्रतिशत मत खसेको छ ।

शनिबार सम्पन्न मतदानमा ७० प्रतिशत मत खसेको निर्वाचन आयोगले जनाएको छ । उक्त निर्वाचन क्षेत्रमा ४५ हजार १५ जना मतदाता रहेका थिए । सो क्षेत्रमा २२ वटा मतदान केन्द्र निर्धारण गरी मतदान सम्पन्न भएको जिल्ला निर्वाचन कार्यालय भक्तपुरले जानकारी दिएको छ ।

धरान : धरानमा ५९.४१ प्रतिशत मत खसेको छ । धरान उपमहानगरपालिकाको रिक्त रहेको मेयर र धरान–७ को वडाध्यक्ष पदका लागि शनिबार मतदान सम्पन्न भएको हो ।

उपनिर्वाचनमा धरानमा ५५ हजार १६३ मतदाताहरुले मतदान गरेको मुख्य निर्वाचन अधिकृत राधाकृष्ण उप्रेतीले जानकारी दिए । धरानमा कुल ९२ हजार ८५३ मतदाता थिए । मतदान शान्तिपूर्ण सम्पन्न भएको जनाइएको छ ।