३९ स्थानको मत परिणाम सार्वजनिक, भक्तपुरमा कांग्रेस जितको नजिक

१५ मंसिर, काठमाडौं । जनप्रतिनिधिहरु रिक्त भएका ५२ पदका लागि शनिबार भएको उपनिर्वाचन २०७६ को हालसम्म ३९ स्थानीय तहका वडाध्यक्षको अन्तिम मतपरिणाम सार्वजनिक भएको छ ।

निर्वाचन आयोगका अनुसार नेपाल कम्युनिष्ट पार्टी (नेकपा) का २२, नेपाली कांग्रेसका ११, राष्ट्रिय जनता पार्टी (नेपाल)का तीन र समाजवादी पार्टीका उम्मेदवारले तीन स्थानमा विजय प्राप्त गरेका छन् ।

कास्की जिल्ला निर्वाचन क्षेत्र नं २ प्रतिनिधिसभा सदस्य, भक्तपुरको प्रदेशसभा सदस्य निर्वाचन क्षेत्र नं १ (क), धरान उपमहानगरपालिका प्रमुख, महोत्तरीको पिपरा गाउँपालिकाको अध्यक्ष पदको शनिबार भएको निर्वाचनको मतगणना कार्य भइरहेको छ ।

प्रतिनिधिसभा सदस्य बागलुङ निर्वाचन क्षेत्र नं २ (ख) र दाङ प्रदेशसभा सदस्य क्षेत्र नं ३ (ख) को मतगणना आज शुरु हुने सम्बन्धित मुख्य निर्वाचन अधिकृतको कार्यालयबाट थाहाभएको छ ।

भक्तपुरमा जारि मतगणनाको अन्तिम चरणमा पुगेको छ । प्राप्त पछिल्लो जानकारी अनुसार भक्तपुरमा कांग्रेसका उमेद्दवार कृष्णलाल भँडेल जितको नजिक पुगेका छन् । नेपाल कम्युनिष्ट पार्टी (नेकपा)का देवीप्रसाद ढकालले उनलाई पछ्याइरहेका छन् ।