नेप्से स्थिर भएपनि जीवन बीमा कम्पनीहरुको उपसूचकमा सर्वाधिक बृद्धि, प्राविधिक विश्लेषणले के देखाउँछ ?

१५ मंसिर, काठमाडौं । आजपनि बजार स्थिर नै रह्यो । बजार बन्द हुँदा हल्का बढेर मात्र बन्द भयो । बजार स्थिर भएसंगै कारोवार रकम पनि सुस्त नै रहेको छ । दिनभरिमा २० करोड ६३ लाखको मात्र कारोवार भएको छ ।

आज नेप्से परिसूचक सामान्य ० दशमलव ०७ अंकले बढेर १११२ दशमलव ८५ को विन्दुमा बन्द भएको छ । जीवन बीमा कम्पनीहरुको उपसुचकमा सर्वाधिक २ दशमलव ६१ प्रतिशतको वृद्धि देखिएको छ ।

नेप्से परिसुचकले २ बजेर ४४ मिनेटमा सर्वाधिक १११४ दशमलव ३२ को उच्च विन्दु समातेको थियो भने १ बजेर  ३६ मिनेटमा ११०९ दशमलव ९८ को न्यून विन्दु समातेको थियो ।

आज बजारमा नबिल बैंकको सर्वाधिक १ करोड ७५ लाखको शेयर खरिदबिक्री हुँदा नेपाल लाईफ इन्स्योरेन्सका शेयरधनीले सर्वाधिक ४ दशमलव ७३ प्रतिशतले कमाए भने घोडीघोडा लघुवित्तका शेयरधनीले सर्वाधिक ९ दशमलव ९ प्रतिशतले गुमाए । नेपाल लाईफ इन्स्योरेन्सको शेयरमूल्य प्रतिकित्ता ८४२ मा बन्द भएको छ भने घोडीघोडा लघुवित्तको बजार मूल्य प्रतिकित्ता ५८२ मा बन्द भएको छ ।

प्राविधिक विश्लेषण:
प्रतिरोध : ११२०                                          टेवा : ११००

• आज नेप्सेमा खरिदकर्ता र विक्रीकर्ताको चाप दुबै बराबर रहेको छ । कारोबार भने अघिल्लो कारोबार दिनभन्दा घटेको छ । अन्तिम दिनको मैनबत्तीले अघिल्लो दिनमा रहेको बिक्रीकर्ताको चाप कमजोर हुँदै गएको जनाएको छ ।
• दैनिकी अवधिमा “आरएसआई” अझै पनि “न्यूट्रल जोन” भन्दा तल रहेको छ । आरएसआई ३५ दशमलब ६९ बिन्दुमा छ । यसले बजार बढी हाल्ने संकेत गरेको देखिदैन् ।
• “एडिएक्स” तथा जोड बिजोड डाइरेक्सनल इन्डेक्सहरुले हाल बजार तटस्थ रहेको संकेत गरेको छ ।
• “अन ब्यालेन्स भल्यूम” हाल प्रभावकारी देखिन्दैन ।
• नेप्से बढेमा प्रतिरोध ११२१ मा पाउने देखिन्छ र घटेमा मुख्य टेवा ११०० मा पाउने देखिन्छ ।