लघुवित्त र बीमाले गर्दा लगानीकर्तामा छायो खुशीयाली, नेप्से ८ दशमलव ७३ अंकले बढ्यो

१८ मंसिर, काठमाडाैं । लघुवित्त र बीमा कम्पनीका शेयरमा लगानीकर्ताहरु आक्रामक रुपमा प्रस्तुत हुँदा हिजो-अस्ति भन्दा आज बजारमा केही चहलपहल रह्याे ।  सम्पूर्ण उपसुचकमा वृद्धि आएसंगै नेप्से परिसुचकमा ८ दशमलव ७३ अंकको वृद्धि देखियो ।  नेप्से परिसूचक वृद्धि भएसंगै कारोवार रकम पनि बढेको छ । कारोवार रकम ३० करोड माथि पुगेको छ ।

जीवन बीमा कम्पनीहरुको उपसुचकमा २ दशमलव ८१ प्रतिशतको वृद्धि देखिएको छ भने निर्जीवन बीमा कम्पनीहरुको उपसुचकमा २ दशमलव ५६ प्रतिशत र लघुवित्त कम्पनीहरुको उपसुचकमा २ दशमलव २२ प्रतिशतको वृद्धि देखिएको छ ।

धेरै लघुवित्त कम्पनीहरुले लाभांश प्रस्ताव गरेको र जीवन तथा निर्जीवन बीमा कम्पनीहरुले लाभांश प्रस्ताव गर्न बाँकी हुँदा यी कम्पनीहरुको शेयर मुल्यमा लगानीकर्ताको ध्यान केन्द्रित भएको शेयरबजार सम्बन्धी जानकार बताउँछन ।

बजार खुलेबाट नै खरिदकर्ता आक्रामक रहेको बजारले २ बजेर ३८ मिनेटमा उच्च विन्दु समातेको थियो । आजको बजारको उच्च विन्दु ११२८ दशमलव ०१ रहेको थियो ।

केही दिनयता ११०० लाई टेवा मान्दै बजार घट्न मानेको छैन ।  बजार वृद्धिसंगै कारोवार रकम वृद्धि हुनुलाई सकारात्मक प्रवृत्ति मानिन्छ ।

बीमा र लघुवित्तको चहलपहल रहेको बजारमा नेपाल लाईफ इन्स्योरेन्सको सर्वाधिक किनबेच भएको छ ।  नेपाल लाईफ इन्स्योरेन्सको २ करोड ८२ लाख बराबरको शेयर खरिदबिक्री भएको छ भने प्रभु इन्स्योरेन्सको बजारमूल्य सर्वाधिक ८ दशमलव ५० प्रतिशतले वृद्धि भयो त्यस्तै बरुण हाईड्रोपावरको बजार मूल्य ७ दशमलव ९५ प्रतिशतले घट्न पुग्यो ।

 प्राविधिक विश्लेषण:

प्रतिरोध : ११३०                                                   टेवा : १११०

• आज नेप्सेमा खरिदकर्ताको चाप रहेको देखिन्छ । कारोबार भने अघिल्लो दिनभन्दा बढेको छ ।
• अन्तिम दिनको मैनबत्तीले आपूर्तीभन्दा माग बढेको जनाएको छ ।
• दैनिकी अवधिमा “आरएसआई” “न्यूट्रल जोन” मा आएको छ। आरएसआई ४८ को बिन्दुमा छ । आरएसआईले खरिदकर्ताको चाप सकारात्मक हुन थालेको संकेत गरेको छ ।
• “एडिएक्स” सामान्य रहे पनि जोड र बिजोड डाइरेक्सनल इन्डेक्सहरुले बजार बढ्न सक्ने संकेत गरेको छ ।
• “अन ब्यालेन्स भल्यूम” ले बजारमा खरिदकर्ताको चाप हुन थालेको संकेत गरेको छ ।
• नेप्से बढेमा प्रतिरोध ११३० मा पाउने देखिन्छ र घटेमा टेवा १११० मा पाउने देखिन्छ ।