लघुवित्त र बीमा कम्पनीमा लगानीकर्ता आकर्षित हुनुको कारण के ? हेरौं आजको बजार विश्लेषण

१९ मंसिर, काठमाडाैं । लघुवित्त र बीमा कम्पनीमा आज पनि खरिद चाप देखिँदा बजारमा चहलपहल राम्रै थियो । जीवन बीमा कम्पनीहरुको उपसुचकमा २ दशमलव ९३ प्रतिशतको वृद्धि देखिएको छ भने निर्जीवन बीमा कम्पनीहरुको उपसुचकमा १ दशमलव ७७ प्रतिशत र लघुवित्त कम्पनीहरुको उपसुचकमा १ दशमलव ६१ प्रतिशतको वृद्धि देखिएको छ ।

“ट्रेडिङ्ग” उपसुचकमा भने सर्वाधिक ३ दशमलव ७६ प्रतिशतको वृद्धि देखिएको छ । बजारलाई ड्राईभ गर्ने वाणिज्य बैंकहरुको उपसुचकमा भने सामान्य शुन्य दशमलव २१ प्रतिशतको मात्र वृद्धि देखिएको छ ।

बजारमा केही समय यता लघुवित्त र बीमा कम्पनीमा लगानीकर्ताहरु आकर्षित हुँदै आएका छन् ।  नेपाली बजारमा बोनस शेयर र हकप्रद शेयरको राम्रो माहोल रहेसंगै कम पुँजी भएका लघुवित्त क्षेत्रका शेयरहरुमा लगानीकर्ताको आकर्षण बढ्दै जानु स्वाभविक भएको जानकार बताउँछन् ।  त्यस्तै धेरै लघुवित्त कम्पनीहरुले लाभांश प्रस्ताव गरेको र बुक क्लोज आउँन बाँकी रहेकोले त्यसको सकारात्मक असर दोश्रो बजारमा परेको देखिन्छ ।

त्यस्तै एउटा पनि जीवन र निर्जीवन बीमा कम्पनीहरुले आर्थिक वर्ष ०७५/७६ को लाभांश प्रस्ताव नगरेकोले पनि लगानीकर्ताहरु जीवन र निर्जीवन बीमा कम्पनीतर्फ आकर्षित भएका छन् ।

वाणिज्य बैंक भन्दा कम पुँजी भएको कारणले पनि लघुवित्त र बीमा कम्पनीको उतारचढाव धेरै नै हुने गरेको छ । कारोवारीको रोजाईमा यी कम्पनीका शेयर पर्नु स्वाभाविक हो ।

नेप्से परिसुचकालाई ड्राईभ गर्ने वाणिज्य बैंकहरुकमा त्यति ठुलो वृद्धि देखिएको छैन ।

आज दोश्रो बजार परिसुचक ७ दशमलव ४५ अंकको वृद्धि हुँदै ११३१ दशमलव ९२ को विन्दुमा बजार बन्द भएको छ । आज ३५ करोड ८८ लाख बराबरको शेयर खरीदबिक्री भए संगै कारोवार रकम पनि बढेको छ । नेप्से परिसूचक वृद्धि भए संगै कारोवार रकम पनि बढ्नुलाई प्राविधिक भाषामा सकारात्मक मानिन्छ ।

आज बजारको न्यून विन्दु ११ बजेर ०५ मिनेट जाँदा ११२४ दशमलव ४४ रहेकोमा उच्च विन्दु २ बजेर ३७ मिनट जाँदा ११३४ दशमलव ९४ रहेको छ । आज बजार खुलेबाट नै घट्न मानेको देखिदैन ।

नेपाल लाईफ इन्स्योरेन्सको सर्वाधिक ३ करोड ५१ लाख बराबरको शेयर खरिद बिक्री भएको छ ।

आजको बजारको प्राविधिक विश्लेषण:

प्रतिरोध : ११५० टेवा : १११८

• आज पनि नेप्सेमा खरिदकर्ताको चाप रहेको देखिन्छ । कारोबार भने अघिल्लो कारोबार दिनभन्दा बढेको छ । अन्तिम दिनको मैनबत्तीले आपूर्तीभन्दा माग बढेको जनाएको छ ।
• दैनिकी अवधिमा “आरएसआई” “न्यूट्रल जोन” मा आएको छ । आरएसआई ५३ दशमलब ९८ को बिन्दुमा छ । आरएसआईले खरिदकर्ताको चाप सकारात्मक हुन थालेको संकेत गरेको छ ।
• “एडिएक्स” सामान्य रहे पनि जोड र बिजोड डाइरेक्सनल इन्डेक्सहरुले बजार बढ्न सक्ने संकेत गरेको छ ।
• “अन ब्यालेन्स भल्यूम” ले बजारमा खरिदकर्ताको चाप हुन थालेको संकेत गरेको छ ।
• नेप्से बढेमा प्रतिरोध ११५० मा पाउने देखिन्छ र घटेमा टेवा १११८ मा पाउने देखिन्छ ।