रंगशालामा दर्शक र पत्रकारमाथि प्रहरीकाे दमन, घाइते पत्रकार अस्पताल भर्ना

२४ मंसिर काठमाडौं । काठमाडौंमा जारी दक्षिण एसियाली खेलकुद ‘साग’को १३ संस्करण रंगशालामा दर्शक र पत्रकारमाथि प्रहरी लौरो वर्षाएको छ । आज हुने साग समापनमा सहभागि हुन पुगेका दर्शक र समाचार रिर्पोटिङका लागि पुगेका पत्रकारमाथि भिड बढाएको भन्दै प्रहरीले धक्कामक्का र लाठिचार्ज गरेपछि रंगशालाक्षेत्रमा तनाव बढेको छ ।

टिकट मूल्य वृद्धिको विरोधमा दर्शकले रंगशालाबाहिर प्रदर्शन गरेपछि त्यसको रिपोर्टिङ गर्ने क्रममा नागरिक दैनिकका खेल पत्रकार सुमन चापागाईंलाई प्रहरीले कुटपिट गरेको हो । पत्रकार चापागाईंलाई डीएसपी सन्तोषसिंह राठोर, रुगम कुँवरलगायत प्रहरीले आधिकारिक एक्रिडेसन कार्ड लगाएको अवस्थामा नै कुटपिट गरेपछि अवस्था तनावग्रस्त भएको छ । त्यस्तै, पत्रकारलाई पनि प्रहरीले फोटो खिचेको भन्दै क्यामारा फुटाउने धम्की दिएको थियो ।

पत्रकार चापागाईंको कानबाट समेत रगत आएपछि उपचारका लागि अस्पताल लगिएको छ । प्रत्यक्षदर्शीका अनुसार पुलिसले सर्वसाधारणमाथि अत्याधिक दमन गरेपछि पत्रकार चापागाईंले रिपोर्टिङ गर्दा उनलाई अपशब्द बोल्दै आक्रमण गरिएको थियो ।

आज विभिन्न पाँच विधामा प्रतिस्पर्धा हुँदै छ । फुटबल, बक्सिङ , बास्केट बल, जुडो र स्क्वासको अन्तिम प्रतिस्पर्धासंग आजै सागको समापन गर्ने कार्यक्रम रहेको छ ।आज नेपाल र भूटानबीच पुरुषतर्फको फाइनल फुटबलको प्रतिस्पर्धा हुँदैछ ।

उक्त प्रतिस्पर्धा हेर्न दर्शकको घुइँचो बढेको छ । निर्धारित सिट पूरा भएपनि दर्शकको भीड भने थामिनसक्नु रहेको छ । यतिखेर त्रिपुरेश्वरस्थित दशरथ रंगशाला क्षेत्रमा भीड बढेको छ ।

यसैक्रममा प्रहरी र दर्शकबीच घम्साघम्सी परेको छ । प्रहरीले लाठी चार्ज गर्नु पर्ने अवस्था निर्माण भएको छ । उक्त घटनाको रिपोर्टिङ गर्ने एकजना खेल पत्रकारसमेत प्रहरीको आक्रमणको शिकार भएका छन् । आज साँझ समापन गरिने विशेष भव्य कार्यक्रमलाई प्रधानमन्त्री केपी ओलीले भिडियो संवोधन गर्ने कार्यक्रम रहेको छ ।

दर्शकमाथि गरेको लाठी प्रहारको फोटो खिचिरहेका पत्रकार सुमन चापागाईँमाथि पनि प्रहरीले आक्रमण गरेको छ । पत्रकार चापागाईँको कानमा चोट लागेको छ । प्रहरीले केही दर्शकलाई भ्यानमा राखेर लगेको त्यहाँ रहेका पत्रकारहरुले बताएका छन् ।

दशरथ रंगशालाको क्षमता १५ हजार दर्शकको हो । साग फाइनलका लागि टिकट खुलेको तीन घण्टा नपुग्दै सकिएको थियो ।