कांग्रेस भित्रको विवाद, एक अर्कालाई गलाउने रणनीति

३ पुष, काठमाडौं । नेपाली कांग्रेस भित्रको पछिल्लो विवादले निकास नपाएसँगै अन्यौल र अनिश्चयको बादल भने मडारिन थालेको छ । पार्टीको १४ औं महाधिवेशनको कार्यतालिका र विभाग थप एवं केही भातृसंस्थाको नेतृत्व चयनको विषयमा विवाद चर्किएको हो ।

विवाद चुलिएसँगै पार्टीको निर्धारित कार्यसमिति बैठक नै बस्न सकेको छैन । गत विहीबारका लागि डाकिएको कार्यसमिति बैठकमा असन्तुष्ट पक्ष उपस्थित नभएकाले औपचारिक रुपमा सम्पन्न हुन नसकेको हो । संस्थापन र असन्तुष्ट पक्ष भने एकआपसलाई गलाउने रणनीतिमा अडिग देखिएका छन् ।

तेस्रो धारको प्रतिनिधित्व गर्ने अर्का नेता कृष्णप्रसाद सिटौला पनि अहिले संस्थापन पक्षसँग टाढै छन् । उनको समूहले समेत केन्द्रीय कार्यसमिति बैठक बहिष्कार गर्दै आएको छ ।

समस्याको चुरो भनेको महाधिवेशनको कार्यतालिका मात्र होइन । यस सम्बन्धमा संस्थापन र असन्तुष्ट पक्षले पटकपटक वार्ता गरिसकेका छन् । साथै सहमति जुटाउने बिन्दू पनि फेला पारिसकेका छन् । तर नमिलेको कुरा चाहिं नेपाल विद्यार्थी संघ र नेपाल तरुण दलको तदर्थ समिति नै हो ।

असन्तुष्ट पक्षले कम्तिमा एउटाको नेतृत्व पाउनु पर्ने र निश्चित प्रतिशत भागबण्डा पाउनुपर्ने माग गरेको छ । तर संस्थापन पक्ष भने दुवैको नेतत्व आफैं राख्ने अनि सकेसम्म थोरै भाग दिने मनस्थितिमा छ । त्यसैले अब पनि वैठकमा नआए बहुमतीय आधारमै निर्णय गर्ने सन्देश संस्थापन पक्षबाट संप्रेषण हुन थालेको छ ।

सधैं भागवण्डामा सहमति गर्दा आफ्नो पक्ष कमजोर भएको भन्दै युवा नेताहरुले यसपाली मुद्धामा मात्र सहमति गर्न पौडेललाई निरन्तर दवाव सिर्जना गरिरहेका छन् । संस्थापन पक्षले तरुण दलमा महामन्त्री भूपेन्द्रजंग शाहीलाई पुनः नल्याउने प्रस्ताव गरेकोमा पौडेल पक्षीय युवा नेताले आपत्ति जनाएका छन् ।

त्यस्तै असन्तुष्ट पक्षले पनि संस्थापन पक्ष बहुमतले पेल्ने मनस्थितिमा भए आफूहरु पनि समानान्तर समिति बनाएर अघि बढ्ने बताइरहेका छन् । दुबै पक्षको तानातानमा निर्णायक हुने गरेको सिटौला समूह यसपाली रामचन्द्र पौडेल नजिक देखिएको छ । त्यसैले उनको समर्थन नलिई बहुमतकै भरमा अघि बढ्न मुश्किल भएको बुझाई संस्थापन पक्षको रहेको छ । सिटौलाकै आग्रहमा संस्थापन पक्षले कार्यसमिति वैठक दुईपटक स्थगन गरेको बताइरहेको छ ।

भोलि शुक्रबार पनि अपरान्ह् १ बजेका लागि बैठक डाकिएको छ । तर सानेपास्थित केन्द्रीय कार्यालयमा नेपाल विद्यार्थी संघको धर्ना र अनशन जारी छ । यो विवाद नमिलाई बैठक गर्न दुबै पक्षलाई सकस छ । त्यसैले बाहिर जे भनेपनि भित्रभित्रै भने समस्याको हल खोजेर मात्रै बैठकमा जाने निश्कर्षमा दुबै पक्ष रहेका छन् ।

आज पनि संस्थापन पक्षबाट पौडेललाई मनाउन दवाव परेको थियो । विहानै उपसभापति विजयकुमार गच्छदार पौडेल निवास पुगेर मिल्न आग्रह गरे । सधैं भागबण्डामै सहमति हुने परिपाटी रहेकाले मिलाएर भाग लिन उनले पौडेललाई आग्रह गरेका थिए । तर पौडेलमाथि यसपाली भने ठूलै दवाव सिर्जना भईरहेको छ ।

सधैं भागवण्डामा सहमति गर्दा आफ्नो पक्ष कमजोर भएको भन्दै युवा नेताहरुले यसपाली मुद्धामा मात्र सहमति गर्न पौडेललाई निरन्तर दवाव सिर्जना गरिरहेका छन् । संस्थापन पक्षले तरुण दलमा महामन्त्री भूपेन्द्रजंग शाहीलाई पुनः नल्याउने प्रस्ताव गरेकोमा पौडेल पक्षीय युवा नेताले आपत्ति जनाएका छन् ।

गुरुराज घिमिरे, बद्री पाण्डे, जीवन परियार लगायतका नेताले भूपेन्द्रलाई पूर्व अवस्थामै पुन:वहाल नगराउने हो भने पौडेललाई समेत साथ नदिने चेतावनी दिइसकेका छन् । यसले गर्दा नेता पौडेल सित्तिमित्ति सहमति गर्न सक्ने अवस्थामा छैनन् ।

तर जेसुकै भएपनि अहिलेको बेला एकतावद्ध नभइ कार्य समिति बैठक डाक्ने अवस्थामा कोही पनि छैनन् । त्यसैले एक दुई दिन ढिला भएपनि अन्ततः एकताबद्ध भएरै कार्यसमितिले निर्णय गर्ने विश्वास प्रवक्ता शर्माले समेत व्यक्त गरेका छन् ।