झारखण्ड विधानसभा चुनाव : काग्रेस गठबन्धनकाे अग्रता

७ पुस एजेन्सी । भारतको झारखण्डमा भएको विधानसभा चुनावको मतगणना सोमबार भइरहेको छ । जारी मतगणनाको सुरुवाति परिणाम अनुसार काग्रेस गठबन्धनले अग्रता लिएको छ । झारखण्डका ८१ विधानसभा सिटका लागि मतदान भएको थियो । सुरुवाति नतिजामा कांग्रेस–जेएमएम–राजद गठबन्धनले ३७ सिटमा अग्रता लिएको छ ।

यस्तै हाल सत्तामा रहेको भारतीय जनता पार्टी ‘भाजपा’ ले ३४ सिटमा अग्रता लिएको छ । १० सिटमा अन्य राजनीतिक दलका उम्मेदवार अघि रहेका छन् । झारखण्डमा बहुमतका लागि ४१ सिट चाहिन्छ । यो पटक पाँच चरणमा झारखण्ड विधानसभा चुनाव भएको थियो । अन्तिम चरणको मतदान शुक्रबार भएको थियो ।

अधिकांश एक्जिट पोलले कांग्रेस–जेएमएम–राजद गठबन्धनलाई अघि देखाएका छन् । हाल झारखण्डमा भाजपाका रघुबर दासको नेतृत्वमा सरकार छ । अब उनको सरकार कायम नरहेने संकेत देखिएको छ । दास पाँच वर्षको कार्यकाल पूरा गर्ने राज्यका पहिलो मुख्यमन्त्री हुन् ।

हाल झारखण्ड विधानसभामा भाजपाका ४४ विधायक छन् । यो पटकको चुनावमा भाजपा विरुछ झारखण्ड मुक्ति मोर्चा, कांग्रेस र राष्ट्रिय जनता दलले गठबन्धन बनाएका हुन् । यो गठबन्धनले हेमन्त सोरेनलाई भावी मुख्यमन्त्रीका रुपमा घोषित गरेको छ ।