झारखण्ड विधान सभा चुनाव : भाजपाकाे लज्जास्पद हार

८ पुस एजेन्सी । भारतको सत्ताधारी भारतीय जनता पार्टी ‘भाजपा’ ले पूर्वी राज्य झारखण्डमा भएको विधान सभा चुनावमा लज्जास्पद हार बेहोरेको छ ।

निर्वाचन आयोगका अनुसार मुख्य विपक्षी दल भारतीय कांग्रेस पार्टी र उसको क्षेत्रीय गठबन्धनले ८१ सीटमध्ये ४७ सिटमा जित हासिल गरेको छ भने भाजपाले २५ सिटमा जित हासिल गरेको छ ।

त्यस्तै झारखण्ड विकास मोर्चाले ३ सिटमा जित हासिल गरेको छ भने अल झारखण्ड स्टुडेन्ट युनियनले २ सिट जितेको छ । कम्युनिष्ट पार्टी इन्डियाले एक र नेस्नालिष्ट काँग्रेस पार्टीले एक सिट जितेको छ भने स्वतन्त्र २ जनाले जितेका छन् ।

योसँगै भारतीय सत्तारुढ दल भाजपाले राजस्थान, मध्यप्रदेश, छात्तिसगढ़ र महाराष्ट्रपछि पाँचौ राज्य झारखण्डमा पनि आफ्नो सत्ता गुमाएको छ । यस निर्वाचनमा झारखण्डका मुख्यमन्त्री रघुवीर दाससहित ५ मन्त्री पराजित भएका छन् । मुख्यमन्त्री दासलाई भाजपाकै बागी उम्मेदवार तथा उनकै मन्त्रीमण्डलका खाद्य मन्त्री एवं संसदीय कार्यमन्त्री सरयु रायले हराएका छन् ।

हालै सम्पन्न लोकसभा चुनावमा झारखण्डमा भाजपाले ५१ प्रतिशत मत प्राप्त गरेकोमा यस विधानसभा चुनावमा भने भोट घटेर ३३ प्रतिशत पुगेको छ ।