ए डिभिजन लिगमा आज दुई खेल हुँदै

९ पुस काठमाडौं । शहीद स्मारक ए डिभिजन लिग फुटबल अन्तर्गत बुधबार दुईवटा खेल हुँदै छन् । बुधबारको पहिलो खेलमा मच्छिन्द्र क्लबले फ्रेण्ड्स क्लबसँग प्रतिस्पर्धा गर्ने छ । यो खेल दिउँसो १२ बजेपछि एन्फा मैदान सातदोबाटोमा हुनेछ ।

यसअघि भएका दुई मध्ये एकमा जित एकमा बराबरीसहित मच्छिन्द्र क्लबले चार अंक जोडेको छ । यसअघिका दुवै खेलमा पराजित भएको फ्रेण्ड्स क्लब पहिलो जितको खोजीमा छ ।

बुधबार नै हुने अर्को खेलमा च्यासल युथ क्लबले ले न्युरोड टिम एनआरटीसँग प्रतिस्पर्धा गर्नेछ । च्यासलले यसअघि भएका दुई मध्ये एकमा जित र एक खेलमा बराबरी गरेर चार अंक जोडेको छ । च्यासलले पहिलो खेलमा संकटालाई २–० ले पराजित गरेको थियो भने दोस्रो खेलमा मच्छिन्द्रसँग १–१ को बराबरी खेलेको थियो ।

दुवै खेलमा च्यासलका लागि सन्तोष साहुखलले गोल गरेका थिए । उनले घरेलु लिगमा अहिलेसम्म ९९ गोल गरिसकेका छन् । बुधबारको खेलमा एक गोल गर्न सकेमा उनी घरेलु लिगमा १०० गोलको आँकडा पूरा गर्ने पहिलो खेलाडी हुने छन् ।