प्रदेश ३ को नाम बाग्मती, हेटौंडा राजधानी हुने

१३ पुष, काठमाडौं । लामो छलफल र बहसपछि प्रदेश नं. ३ को नाम र राजधानीबारे सत्तारुढ नेपाल कम्युनिष्ट पार्टीले आज टुंगो लगाएको छ ।

पार्टी सचिवालयको आज विहान बसेको बैठकले प्रदेश ३ को नाम बाग्मती र राजधानी हेटौंडा कायम गर्ने निर्णय गरेको हो ।
प्रदेश सभामा नेकपाको झण्डै दुईतिहाई बहुमत छ । साथै प्रमुख प्रतिपक्षी नेपाली कांग्रेस पनि राजधानी हेटौंडा नै कायम गर्ने पक्षमा रहेकाले यसबारेको अन्योल सकिएको छ ।

प्रदेशको नाममा समेत अब खासै समस्या नहुने अवस्था रहेकाले बाग्मती नै कायम हुने बलियो आधार रहेको देखिन्छ । आजको सचिवालय बैठकले यसबारे निर्देशन दिएकाले अबको अधिवेशनले नाम र राजधानीबारे टुँगो लगाउने भएको छ ।

यसअघि नेकपा भित्रै प्रदेश राजधानी र नामबारे विवाद थियो । त्यसैले लगभग दुई वर्षको अवधि त्यसै खेर गयो । यसअघि दुई वटा प्रदेशले मात्र नाम र राजधानी टुंगो लगाएका थिए । कर्णाली र सुदूर पश्चिमको नामाकरण भइसकेको छ ।