कांग्रेस बैठक विहीबार बस्ने

१५ पुष, काठमाडौं । आन्तरिक विवादको भूमरीमा परेको प्रमुख प्रतिपक्षी दल नेपाली कांग्रेस केन्द्रीय कार्यसमिति वैठक पर्सि विहीबार बस्ने भएको छ ।

आगामी १४ औं महाधिवेशनको तालिका तत्काल पेश गर्न माग राख्दै आएको असन्तुष्ट पक्षको माग बेवास्ता गर्दै संस्थापन पक्षले वहुमतका आधारमा एकलौटी निर्णय थालेको छ ।

गत पुस ११ गते असन्तुष्ट पक्षले वैठक बहिष्कार गरेकै अवस्थामा संस्थापन पक्षले वहुमतका अधारमा पेलेरै अघि बढ्ने रणनीति अख्तियार गरेको छ ।

उक्त निर्णयको असन्तुष्ट पक्षले कडा प्रतिकार गरेको छ । पुरानो निर्णय नसच्चिएसम्म संस्थापन पक्षसँग छलफल समेत नगर्ने असन्तुष्ट पक्षको सोच रहेको छ ।

आगामी पुस १७ गते बस्ने भनिएको वैठकमा पनि असन्तुष्ट पक्ष अनुपस्थित हुने जानकारी दिइएको छ । राष्ट्रियसभाको आसन्न निर्वाचनबारे छलफल गर्न कार्यसमिति बैठक आह्वान गरिएको केन्द्रीय कार्यालय सचिव कृष्णप्रसाद पौडेलले बताए ।

साथै यसबारे थप छलफल गर्न संस्थापन पक्षका तर्फबाट उपसभापति बिमलेन्द्र निधि हिजो वरिष्ठ नेता रामचन्द्र पौडेललाई भेट्न बोहराटार पुगेका थिए ।