सभामुख चयनको सकसले संसद् वैठक फेरि स्थगित

१५ पुष, काठमाडौं । सत्तारुढ नेपाल कम्युनिष्ट पार्टीले सभामुख चयन गर्न नसक्दा संघीय संसद् अनिर्णयको बन्दी बन्नु परेको छ । आजका लागि बोलाइएको संसद् बैठक सूचना टाँसेर स्थगित भएको छ ।

आगामी बैठक पुस २७ गतेका लागि बोलाइएको छ । आज पनि सभामुख छान्न नेकपाका दुई शीर्ष नेताले छलफल गरेका थिए । विहान प्रधानमन्त्री निवास बालुवाटारमा भेटेका दुबै नेताले कसलाई सभामुख बनाउने भन्नेमा सहमति गर्न सकेनन् ।

प्रधानमन्त्री खड्गप्रसाद ओली पूर्व सभामुख सुभाषचन्द्र नेम्बाङलाई उक्त जिम्मेवारी दिन चाहन्छन् । तर अर्का अध्यक्ष पुष्पकमल दाहाल प्रचण्ड भने पूर्व माओवादी नेतालाई सो जिम्मेवारी दिनुपर्ने पक्षमा रहेका छन् । उता, राष्ट्रपति विद्यादेवी भण्डारी भने वर्तमान उपसभामुख शिवमाया तुम्बाहाम्फेलाई सभामुख बनाउनुपर्ने पक्षमा रहेकी छन् ।

राष्ट्रपति भण्डारीले आफ्नो धारणा प्रधानमन्त्री ओलीलाई भनिसकेकी छन् । त्यसैले दुबै नेताबीच विवाद भएको अवस्थामा तुम्बाहाम्फे नै नयाँ सभामुख बन्ने सभावना बलियो देखिएको छ । तुम्बाहाम्फेले पनि आफ्नो दावी पेश गर्दै हालसम्म उपसभामुख पदबाट राजीनामा दिएकी छैनन् ।