एसपी मल्ललाई १२ घण्टे पुर्जी !

१७ पुष, काठमाडौं । सत्तारुढ नेकपाका अध्यक्ष प्रचण्डका पूर्व बडीगार्ड रहेका जिल्ला प्रहरी कार्यालय चितवनका प्रमुख एसपी दानबहादुर मल्ललाई ३ नं. प्रदेश प्रहरी कार्यालयले १२ घण्टे पुर्जी थमाएको छ ।

सरुवा भएको ठाँउमा जान अटेर गरि चितवन जिल्ला मै बस्ने अडान लिई विभिन्न राजनीतिक दवाव दिन थालेपछि प्रदेश प्रहरीले उनलाई १२ घण्टाभित्र डीएसपीलाई बुझबुझारथ गर्दै चितवन जिल्ला छाड्न निर्देशन दिएको हो ।

हिजो पुष १६ गतेको मितिमा प्रदेश प्रहरीका एसपी अरुण पौडेलले हस्ताक्षर गरेको पत्र संख्या नम्बर ८१०५ रहेको प्रहरी संचारमा भनिएको छ- “यस कार्यालयको सि.न. ८०३४ को संचार त्यहाँ कार्यालयमा प्राप्त भएकै छ । सो सम्बन्धमा प्र.उ. दानबहादुर मल्ललाई हालसम्म पनि सरुवा भएको दरबन्दीमा रवाना गरेको जानकारी यस कार्यालयमा प्राप्त हुन नआएकोले तहाँ का.मा कार्यरत प्रनाउलाई कार्यालयको सम्पूर्ण चार्ज बुझाई १२ घण्टाभित्र ठेकिएको दरबन्दीमा रवाना गरि सो को जानकारी तालुक का. तथा यस का. मा समेत दिनुहुन निर्देशानुसार अनुरोध छ ।” सो पत्रको बोधार्थ प्रहरी प्रधान कार्यालय, महानिरीक्षकको सचिवालयलाई पनि गराइएको छ ।

प्रहरी प्रधान कार्यालयले गत पुस ४ गते एसपी मल्लसहित २४ एसपीको सरूवा गरेको थियो । चितवनमा एसपी गंगा पन्तको सरूवा भएको छ । मल्लको त्रिवि एयरपोर्टमा सरुवा भएको छ । सरुवा भएको यति लामो अवधिसम्म पनि मल्लले चितवन जिल्ला नछोडेपछि सो ठाँउमा सरुवा भएकी गंगा पन्तले हाजीर हुन जान पाएकी थिइनन् ।