नेकपाको सचिवालय बैठक बस्दै: सभामुख पूर्व एमालेकै भागमा पार्न राष्ट्रियसभामा मिलाइने

१७ पुष, काठमाडौं । सत्तारुढ नेपाल कम्युनिष्ट पार्टीले रिक्त सभामुख पदमा आफ्नो दावी प्रस्तुत गरेपनि नाममा सहमति जुटाउन नसक्दा समस्या देखिएको छ । पुस ४ बाट सुरु संसदको हिउँदे अधिवेशनको पहिलो कार्य सूचीमा परेको सभामुख चयन प्रक्रिया नै अहिले अवरुद्ध भएको छ ।

नेकपा भित्र सभामुखबारे एकमत नहुँदा संसद अधिवेशन नै बन्धक बन्न पुगेको हो । सभामुख चयनमा नेकपाले निकास नदिएको भन्दै सबैतिरबाट आलोचना भएको छ ।

गत मंगलबारका लागि डाकिएको प्रतिनिधिसभा बैठकमा सभामुख निर्वाचन प्रकृया सुरु गर्ने भनिएको थियो । तर दल भित्र सहमति नभएकाले अघिल्लै दिन अर्थात पुस १५ गते सूचना टाँसेर २७ गतेका लागि सारिएको छ । यसै प्रसंगमा छलफल गर्न आज बेलुकी ४ बजे पार्टी सचिवालयको बैठक डाकिएको छ ।

दुई अध्यक्षबीच नाममा सहमति नभएसम्म सचिवालय बैठकमा छलफल गर्नुको कुनै अर्थ नरहेको एकजना सचिवालय सदस्यले बताएका छन् । बरु आजको बैठकमा राष्ट्रियसभामा रिक्त सदस्यको निर्वाचनका सन्दर्भमा भने छलफल हुने ती सदस्यले बताए ।

राष्ट्रियसभा सदस्यमा पूर्वमाओवादी पक्षलाई बढी दिएर सभामुख चाहिं पूर्वएमाले पक्षले लिने तयारी गरेको पनि जानकारी दिइएको छ । आज यसबारे सचिवालयमा छलफल हुने र टुंगोमा पुगिने पनि उनले बताए ।

सभामुखमा पूर्व एमाले पक्षले सुभाषचन्द्र नेम्बाङ र माओवादी पक्षले अग्निप्रसाद सापकोटाको नाम अघि सारेको छ । यस्तै राष्ट्रपति बिधादेवी भण्डारीले वर्तमान उपसभामुख शिवमाया तुम्बाहाम्फेलाई नै सभामुख बनाउनु पर्ने अडान लिईरहेको नेकपा वृत्तमा चर्चा हुने गरेको छ ।

आजको सचिवालय बैठकले सभामुखको नाममा सहमति जुटाउने एउटा आधार भने पक्कै तयार गर्ने छ – ती नेताले बताए ।