प्रधानमन्त्री बन्ने मोहमा फसेका गौतम

१८ पुष, काठमाडौं । पूर्वएमालेका शीर्ष नेताहरु राजकीय पदको सर्वाेच्च स्थानमा लगभग सबै पुगिसके । अहिले पूर्वमाओवादीसँग एकता गरेर बनेको नेपाल कम्युनिष्ट पार्टीमा शीर्ष स्थानमा रही कृयाशील एकजना नेता वामदेव गौतम मात्र मुलुकको कार्यकारी प्रमुख बन्न नपाउने अभागीमा परेका छन् ।

उनको त्यो चाहना संसद्को यही कार्यकालमा पूरा हुन सक्थ्यो, तर उनी गत निर्वाचनमा बर्दियाबाट पराजित हुनुपर्यो । पार्टी भित्रकै अन्तर्घातले पराजय भाग्नु परेको ठम्याई उनको छ । त्यसविरुद्ध उनले पार्टीका विभिन्न तहमा पटक–पटक आवाज उठाए । तर अध्यक्ष खड्गप्रसाद ओली दाहिना नभएकाले त्यसबेला उनको आवाज दबियो ।

अहिले परिबेश फेरिएको छ । उनी प्रधानमन्त्रीसमेत रहेका पार्टी अध्यक्ष ओली निकट भएका छन् । ओलीले पार्टी विधानमै नभएको उपाध्यक्ष समेत बनाउने भएका छन् । संसद्मा आउन विगतमा तगारो लगाउने उनै ओली यतिबेला उनलाई कास्कीबाट प्रतिनिधिसभामा ल्याउन तयार थिए ।

अफर पनि गरेका हुन्, तर गौतमले आँटेनन् । उनलाई फेरि पनि अन्तर्घात दोहरिने पो हो कि भन्ने त्रासले चुनाव लड्न गएनन् । ओलीको उदारमना उनीप्रति त्यतिमै सीमित रहेन । उनले आगामी माघ ९ गते हुने राष्ट्रियसभाको निर्वाचनमा उमेदवार बन्न अर्काे प्रस्ताव दिए । तर गौतमले त्यो स्वीकार्न एउटा शर्त अघि सारे । त्यो थियो – राष्ट्रियसभा सदस्य समेत प्रधानमन्त्री बन्न पाउने गरी संविधान संशोधन गर्नुपर्छ ।

गौतमको सो प्रस्ताव पारित गर्न ओलीले रुची देखिएनन् । त्यसैले आज नेकपा सचिवालय बैठकले तय गरेको राष्ट्रियसभा सदस्यको सूचीमा गौतमको नाम अटाएन ।

आजै बिहान बसेको सचिवाल बैठकमा पनि अहिले कार्यकारी अध्यक्षको हैसियतमा रहेका पुष्पकमल दाहाल प्रचण्डले समेत गौतमलाई राष्ट्रियसभामा जान प्रस्ताव गरेका थिए । आज पनि उनले आफ्नो पुरानै अडान दोहाेर्याए । म अब उपप्रधानमन्त्री बन्न राष्ट्रियसभामा जाने हो र ? राष्ट्रियसभा सदस्यलाई प्रधानमन्त्री बन्न मिल्ने संशोधन नगर्ने हो भने मेरो के काम छ र ? त्यसपछि भने उमेदवारको नाम तय भयो ।