सुनको भाउ अचाक्ली बढेपछि कारोकार ठप्प !

२३ पुस काठमाडौं । सुनको भाउ इतिहासकै नयाँ उचाईमा पुगेको छ । इरान र अमेरिकाबीच युद्ध हुन सक्ने खतराका कारण अन्तराष्ट्रिय लगानीकर्ताहरु सुन सञ्चय गर्नेतर्फ आकर्षित भएका छन् ।

सुनलाई सबैभन्दा सुरक्षित लगानी ठान्दै लगानीकर्ताहरु यतातर्फ मोडिंदा भाउ अचाक्ली बढेको नेपाल सुनचाँदी व्यवसायी महासंघको भनाई छ । बुधबार सुनको भाउ प्रतितोलामा १ हजार रुपैयाँ बढेर ७६ हजार ५०० रुपैयाँ पुगेको हो ।

यो अहिले सम्मकै उच्च मूल्य हो । यसअघि सोमबार सुन तोलाको ७६ हजार रुपैयाँ पुगेको थियो । मंगलबार ५ सय रुपैयाँ घट्दा केही राहत महसुस गरेका सर्वसाधारण खरिदकर्ताले फेरि बुधबार महँगो भाउ तिर्नुपर्ने भएको छ । भाउ अचाक्ली बढेपछि बजारमा कारोबार हुन छाडेको छ ।