थ्री स्टारको ब्रिगेड ब्वाइजमाथि सहज जित

२३ पुस काठमाडौं । काठमाडौमा जारी सहिद स्मारक ’ए’ डिभिजन लिग फुटबल अन्तर्गत बुधबार भएको खेलमा थ्री स्टार क्लबले ब्रिगेड ब्वाईज क्लबलाई पराजित गरेको छ भने पुलिस र च्यासलले बराबरी खेलेका छन् ।

त्रिपुरेश्वरथित दशरथ रंगशालामा बुधबार भएको पहिलो खेलमा १० खेलाडीमा सिमित ब्रिगेड ब्वाईज क्लबलाई ३–१ गोल अन्तरले पराजित गर्दै थ्री स्टार शीर्ष तीनमा उक्लियो । थ्री स्टारलाई जित दिलाउन सुशान्त श्रेष्ठ, अनन्त तामाङ र वासिउ ओलादिरान हाजमातले एक एक गोल गरे ।

ब्रिगेडका रोशन राना मगरले एक गोल फर्काए । पहिलो हाफमै २–० को अग्रता बनाउन सफल थ्री स्टारले खेलको १५ औं मिनेटमा सुशान्तको गोलबाट अग्रता बनाएको थियो । खेलको ४१ औं मिनेटमा मिक्छेन तामाङको कर्नरमा अनन्तले हेडबाट उत्कृष्ट गोल गर्दै थ्री स्टारलाई २–० को अग्रता दिलाए ।

यस्तै थ्री स्टारले ५८ औं मिनेटमा तेस्रो गोल गर्यो । उसका विदेशी खेलाडी हाजमातले ब्रिगेडका डिफेन्डरको गम्भीर गल्तिको फाइदा उठाउदै गोलकिपर विशाल सुनार अगाडी बढेको अवस्थामा चिप गोल गरे । खेलको ६६ औं मिनेटमा ब्रिगेड १० खेलाडीमा समेटियो ।

थ्री स्टारका अशोक खवासलाई खराब ट्याकल गरेपछि रेफ्री श्रवन लामाले ब्रिगेडका दिपेन्क राज सिहलाई रातो कार्लेड दिदै मैदानबाट बाहिर पठाएका थिए । त्यसपछि खेलको ९० औं मिनेटमा ब्रिगेडले सान्त्वना गोल फर्कायो । जितसँगै थ्री स्टारले ५ खेलमा १० अंक जोडेको छ । ब्रिगेड ५ खेलमा ६ अंक जोडेर लिगको सातौं स्थानमा रहेको छ ।

यस्तै बुधबार नै भएको दोश्रो खेलमा पुलिसले च्यासलसंग २–२ गोलको बराबरी खेलेको छ । पहिलो हाफमा पुलिसले लिएको २–१ ले लिएको अग्रतालाई दोस्रो हाफमा जोगाउन सकेन । दोस्रो हाफको चौथो मिनेटमा सन्तोषले बराबरी गोल फर्काएका थिए ।

हेमन्त थापा मगरले दिएको क्रसमा हुलमुलका बीचबाट सन्तोषले गोल गरेका थिए । त्यसअघि दशरथ रंगशालामा निरकुमार राईको गोलबाट पुलिसले खेलको पाँचौं मिनेटमा अग्रता लिएको थियो । तर, १८ औं मिनेटमा कप्तान सन्तोषले बराबरी गोल गर्दै च्यासललाई खेलमा फर्काएका थिए ।

त्यो उनको एतिहासिक गोल थियो । लिगमा त्यो उनको सयौं गोल थियो । लिगमा एक सय गोल पुरा गर्ने उनी पहिलो नेपाली खेलाडी हुन् । तर पहिलो हाफको अन्त्यमा पुलिसले सुमन लामाको गोलबाट पुन अग्रता लिएको थियो ।

सुमनले ४० औं मिनेटमा गोल गरेका थिए । दोस्रो हाफमा सन्तोषले ह्याट्रिक पुरा गर्ने केहि अवसर पाए पनि सफल हुन सकेनन् । उनले डेढ दशक लामो खेल जीवनमा सय गोल पुरा गरेका हुन् । जारी लिगको सुरुवाती दुई खेलमा ३ गोल गरेका सन्तोषले पछिल्लो दुई खेलमा भने गोल गर्न सकेका थिएनन् ।