संसदीय दलको निर्णय : प्रदेश ३ काे नाम बाग्मती, राजधानी हेटौंडा

२५ पुष, हेटौंडा । अन्ततः सत्तारुढ दल नेपाल कम्युनिष्ट पार्टी प्रदेश ३ को आज बसेको संसदीय दलको बैठकले राजधानी हेटौंडा र नाम बाग्मती राख्न सहमति जनाएको छ ।

मुख्य मन्त्री डोरमणि पौडेलको हेटौंडास्थित निवासमा बसेको संसदीय दलका बैठकले पार्टी सचिवाल बैठकले दिएको निर्देशन बमोजिम प्रदेशको नाम र राजधानी टुँग्याएको हो ।

सत्ताधारी दलकै साँसद्हरुबाट सचिवालय निर्देशको व्यापक आलोचना भएको थियो । केही सांसद्हरुले पार्टी हाइकमाण्डको निर्देशन अबज्ञा गर्ने र मतदानका बेला फ्लोर क्रस गर्नेसम्मको अभिव्यक्ति दिएका थिए ।

त्यसले पार्टी निर्णयको भविष्यबारे विभिन्न आँकलन गरिएको थियो । सांसद्हरुले अटेर गर्ने संकेत गरेपछि मुख्यमन्त्री पौडेल लगायत प्रमुख नेताहरु पुनः शीर्ष नेतासँग भेट गर्न आएका थिए ।

तर अध्यक्षद्वय खड्गप्रसाद ओली र पुष्पकमल दाहाल प्रचण्डले पूर्व निर्णय कार्यान्वयन गर्न निर्दशन दिएका थिए । त्यसपछि पार्टी निर्णय कार्यान्वयन गर्न ह्विप लगाउने तयारी गरिएको थियो ।

आजको बैठकमा मुख्य मन्त्री पौडेलका साथै नेतृ अष्टलक्ष्मी शाक्यले परिस्थितिबारे ब्रिफिङ गरेपछि सांसद्हरु सहमत भएका हुन् । प्रदेशको नाम र राजधानीबारे टुंगो लगाउन यही पुस २७ गते प्रदेश सभाको वैठक डाकिएको छ ।