सुनको मुल्य सोमबार घट्यो

२८ पुस काठमाडौं । नेपाल सनचाँदी व्यवसायी महासंघको अनुसार सुनको भाउ घटेको छ । सोमबार छापावाला सुनको भाउ प्रतितोला २०० रुपैयाँले घटेर ७४ हजार ८०० रुपैयाँमा आइपुगेको छ ।

आइतबार छापावाला सुनको भाउ ७५ हजार रुपैयाँ रहेको थियो । यस्तै, तेजावी सुनको भाउ पनि प्रतितोला २०० रुपैयाँले नै घटेर ७४ हजार ५०० रुपैयाँमा खरिदबिक्री भएको छ ।

यता, चाँदीको मूल्य भने स्थिर रहेको छ । चाँदी प्रतितोला ८ सय ९० रुपैयाँमा कारोबार भइरहेको नेपाल सुन–चाँदी व्यवसायी महासंघले बताएको छ ।

पछिल्लो समय सुनचाँदीको भाउमा उतारचढाव आउने क्रम जारी छ । विशेषगरी अमेरिका र इरानबीच तनाव बढेपछि सेयर बजारमा केही दिन उछाल आएको थियो ।