यस्तो आयो फर्स्ट माईक्रोफाइनान्सको दोश्रो त्रैमास ? ( तालिकासहित विश्लेषण )

२ माघ, काठमाडाैं । खुद मुनाफामा १९ प्रतिशतले वृद्धि गर्दै दोश्रो त्रैमासको वित्तीय प्रतिवेदनमा फर्स्ट माईक्रोफाइनान्सले सुखद सुरुवात गरेको छ । कम्पनीले चालु आर्थिक वर्षको दोश्रो त्रैमासको वित्तीय विवरण सबैभन्दा पहिला प्रकाशन गरेको हाे ।

प्रकाशित रिपोर्ट अनुसार कम्पनीले दोश्रो त्रैमाससम्म ६ करोड ६९ लाख रुपैयाँ खुद मुनाफा गरेको छ । गत आर्थिक वर्षको दोश्रो त्रैमासमा कम्पनीले ५ करोड ६३ लाख रुपैया खुद मुनाफा गरेको थियो । समिक्षा अवधिमा कम्पनीको खुद मुनाफा १९ प्रतिशतले वृद्धि भएको र चुक्ता पुँजीमा १७ प्रतिशतको वृद्धिको कारणले गर्दा कम्पनीको प्रतिशेयर आम्दानी २ प्रतिशतले मात्र वृद्धि भएको देखिन्छ ।

कम्पनीकाे  प्रकाशित प्रतिशेयर आम्दानी १६ रुपैया ७२ पैसा छ । गत आर्थिक वर्षको दोश्रो त्रैमासमा कम्पनीको प्रकाशित प्रतिशेयर आम्दानी १६ रुपैया ४६ थियो ।

कम्पनीले ५ अर्ब ५४ करोड रुपैया सापटी लिएको छ ।  सापटी रकम २१ प्रतिशतले वृद्धि भएको छ ।  त्यस्तै कर्जा प्रवाह २५ प्रतिशतले वृद्धि हुँदै ५ अर्ब ८४ करोड पुगेको छ ।

प्रमुख आम्दानीको श्रोतकाे रूपमा रहेको खुद व्याज आम्दानी १६ प्रतिशतले वृद्धि हुँदै १० करोड ५८ लाख पुग्दा संचालन मुनाफा २० प्रतिशतले वृद्धि हुँदै १० करोड ६० लाख पुगेको छ ।

कम्पनीको माघ १ गते को बजार मूल्य ४२० लाई आधार मान्दा कम्पनीको मूल्य आम्दानी अनुपात २५ दशमलव १२ गुणा रहेको छ।

विश्लेषण : चुक्ता पुँजी वृद्धि कै हाराहारीमा कम्पनीले खुद मुनाफा वृद्धि हुँदा कम्पनीले आक्रामक रुपमा प्रतिशेयर आम्दानी वृद्धि गर्न सकेन ।  कम्पनीको मूल्य आम्दानी अनुपात २५ गुणा रहेको छ । कम्पनीको बजार मूल्यलाई प्रतिशेयर आम्दानीसँग दाज्दा कम्पनीको बजार मूल्य अलिकता धेरै भएको अनुभूति हुन्छ ।

कम्पनीको कोषको लागत भने घटेको छ । कोषको लागत १० दशमलव ६० प्रतिशत रहेको छ ।  सापटी रकम र कर्जालाई क्रमश २१ र २५ प्रतिशतले वृद्धि गरेको कम्पनीले आफ्नो व्यापार भने राम्रै वृद्धि गर्दै लगेको देखिन्छ ।

कम्पनीले आर्थिक वर्ष ७५/७६ को साधारणसभा सम्पन्न गर्दै १७ प्रतिशत बोनस शेयर र ० दशमलव ८९ प्रतिशत नगद लाभांश दिएको थियो । कम्पनीले प्रत्यक वर्ष लाभांश वृद्धि गर्दै लागेको देखिन्छ ।