चिसो मौसममा तात्यो शेयर बजार, १३०० को प्रतिरोध तोडि्दाँ वाणिज्य बैंकको साथ कायमै

२ माघ,काठमाडाैं ।  आज राजधानीको मौसम चिसो भएपनि साताको अन्तिम कारोवार दिन दोश्रो बजार भने तातेको छ । नेप्से परिसूचक २६ अंकले वृद्धि हुँदै दोश्रो बजार १३१० दशमलव २३ को विन्दुमा बन्द भएको छ ।

२ दशमलव ०२ प्रतिशतले वृद्धि भएको बजारमा १ अर्ब ६९ करोडको कारोवार भएको छ । कारोवार रकममा पनि वृद्धि देखिएको छ । १८१ कम्पनीका ५० लाख २५  हजार कित्ता शेयर खरिदबिक्री भएको छ ।

आज बजारले आज १३०० को मनोवैज्ञानिक प्रतिरोधलाई तोड्न सफल भएको छ ।  १३०० को प्रतिरोध क्षेत्र अब भने टेवा क्षेत्रमा परिणत भएको छ ।

बजार खुले देखिने बुलिस प्रवृत्तिमा थियो । बजारको आजको खुला विन्दु र न्यून विन्दु एकै रहेको छ । आज बजारको खुला विन्दु १२८४ दशमलव २९ रहेको थियो । त्यस्तै बजारले २ बजेर २४ मिनेटमा १३१३ दशमलव ५९ को उच्च विन्दु समातेको थियो ।

बजारलाई मुख्य ड्राईभ गर्ने वाणिज्य बैंकको उपसुचकमा १ दशमलव ६९ प्रतिशतको वृद्धि देखिएको छ । आज फाईनान्स कम्पनीहरुको उपसुचकमा सर्वाधिक ४ दशमलव १६ प्रतिशतको वृद्धि देखिएको छ । आज अन्य उपसुचक बाहेक सबै उपसुचकमा वृद्धि देखिएको छ ।

मदिरा उत्पादन गर्ने कम्पनी हिमालयन डिस्टिलरीको सर्वाधिक १४ करोड ४९ लाख बराबरको शेयर खरिदबिक्री भएको छ भने सिमेन्ट उत्पादन गर्ने कम्पनी शिवम सिमेंट्सको १३ करोड ६० लाख बराबारको शेयर खरिद बिक्री भएको छ ।

एनईबीएल प्रगति फन्ड को मूल्य सर्वाधिक १० प्रतिशतले वृद्धि हुँदा महिला सहयात्रा माईक्रो फाईनान्सको शेयर मूल्य सर्वाधिक २ दशमलव ६८ प्रतिशतले घटेको छ ।

प्राविधिक बिश्लेषण :
मुख्य प्रतिरोध : १३२५ पहिलो टेवा : १३००

• हाल नेप्से गत सातादेखि बढ्दो प्रवृत्तिमा रहेको छ र आज बजारले १२८५ को अवरोधलाई तोडेपछि बजार पुन बढ्न थालेको छ ।
• आज पनि नेप्सेले “बुलिस मारुबोजु” मैनबत्तीको चित्र बनाएको छ । यसले आज पनि बजारमा क्रेताको चाप रहेको जानकारी गर्दछ । यसले बजारमा खरिदकर्ताको चाप केहि समय हुनसक्ने जानकारी गराउँदछ ।
• दैनिकी अवधिमा “आरएसआई” ८५ दशमलब २३ को बिन्दुमा छ । आरएसआईले बजारमा बढी खरिद भएको जनाएको छ ।
• “एडिएक्स” तथा जोड र बिजोड “डाइरेक्सनल इन्डेक्स”हरुले क्रेताको चाप रहेको जानकारी गराएको छ ।
• नेप्सेको प्रवृत्तिलाई “अन ब्यालेन्स भल्यूम” ले  समर्थन गरेको छ ।
• नेप्से बढेमा पहिलो प्रतिरोध १३२५ को क्षेत्रमा पाउने देखिन्छ र घटेमा पहिलो टेवा १३०० को क्षेत्रमा पाउने देखिन्छ ।