कांग्रेस विवाद मिलाउँदै

३ माघ काठमाडौं । प्रमुख प्रतिपक्षी दल नेपाली कांग्रेसभित्र पन्पिएको घाउ विस्तारै खाटा बस्ने तहमा प्रवेश गरेको छ । गत पुस ११ गते सभापति शेरबहादुर देउवाले वहुमतका आधारमा लिएका विवादास्पद निर्णय सच्याउन तयार भएको सूचना पाएपछि कांग्रेसले नयाँ बाटो लिने आधार खडा भएको छ ।

गत मंगलबार र बुधबार पार्टी कार्यालय सानेपामा पार्टीका दोस्रो तहका नेताहरुले छलफल गर्दा यस्तो सहमति जुटेपछि समस्याको हल खोज्ने वातावरण बनेको हो । छलफलमा संस्थापन पक्षबाट उपसभापति विमलेन्द्र निधि, रामचन्द्र पौडेल पक्षबाट पूर्व महामन्त्री प्रकाशमान सिंह र तेस्रो धारबाट कृष्णप्रसाद सिटौला स्वयं सहभागी थिए ।

पुस ११ को निर्णयपछि वरिष्ठ नेता पौडेल र तेस्रो धारका नेता भनिएका पूर्व महामन्त्री सिटौलाले देशभरिका जिल्ला सभापतिहरुलाई परामर्श भेलाका लागि डाकेका थिए । तीन दिनसम्म सञ्चालित उक्त परामर्श भेलामा ४७ जिल्लाका सभापति भेला भएका थिए । भेलाले बहुमतका आधारमा लिइएको निर्णय अमान्य भन्दै पुस ११ गतेको निर्णयको विरोध गरेपछि संस्थापन पक्षमा चर्काे दवाव परेको थियो ।

त्यसपछि विकसित घटनाक्रममा संस्थापन पक्ष लचिलो बनेको थियो । जिल्ला सभापतिहरुसँगको भेटमा सभापति देउवाले आफू लचिलो बन्न तयार रहेको संदेश दिएका थिए । लगत्तै देउवाले वरिष्ठ नेता पौडेल र तेस्रो धारका सिटौलासँग आफ्नै निवासमा बोलाएर छलफल गरेका थिए ।

सोही छलफल बमोजिम पार्टी निर्णयमा परिमार्जन गर्न तयार रहेको भन्दै उपसभापति निधि र पूर्व महामन्त्रीद्वय सिंह र सिटौला रहने कार्यदल बनाइएको थियो । छलफलमा सहमति बेगर भएका निर्णय सच्याउन सभापति देउवा तयार भएको संदेश निधिजीले ल्याउनु भएको भन्दै नेता सिटौलाले अब केही दिनमै सबै विवादको समाधान खोजिने विश्वास प्रकट गरेका छन् ।

यसैबीच राष्ट्रियसभाको आसन्न निर्वाचनमा पार्टीको रणनीति तयार गर्न उपसभापति निधि प्रदेश नं. २ मा खटिएका छन् । उनी चुनावी परिणाम कांग्रेसको पक्षमा पार्न भन्दै हिजै गुह जिल्ला धनुषा गएका छन् । त्यसैले केही दिनका लागि छलफल रोकिएपनि परिणाम सकारात्मक आउने नेता सिटौलाले बताएका छन् ।

राष्ट्रिय सभाको निर्वाचन यही माघ ९ गतेका लागि तय भएको छ । उता, वरिष्ठ नेता पौडेल पनि हाल उपचारका लागि भारतको दिल्ली जानु भएको छ । त्यसैले विवाद टुंग्याउन पौडेलजी पनि रहनु जरुरी छ भन्दै नेता सिटौलाले भने – अर्काे हप्तासम्म समस्याले निकास पाउने छ ।

यसैबीच कार्यदलका सदस्यसमेत रहेका पूर्व महामन्त्री सिंहले पनि पुस ११ को निर्णयमा रहेका कमी कमजोरी सच्याउन देउवा तयार भएको संदेश पाएको जानकारी दिए ।उनले भने – निधिजीले हामीसँगको पछिल्लो छलफलमा यस्तो संदेश सनाएका थिए । महाधिवेशनको कार्यतालिका र कार्यविधि सच्याउन तयार हुने वित्तिकै समस्याको हल पहिल्याउन समस्या हुँदैन – नेता सिंहले भनेका छन् ।

यस सन्दर्भमा कार्यदलकै अर्का सदस्य एवं पार्टी उपसभापति निधिले पनि छलफल सकारात्मक रहेको बताए । तर कार्यतालिकामा हेरफेर गर्ने भन्ने कुरा चाहिं भएको छैन , बरु कार्यविधिगत रुपमा रहेका समस्याको गाँठो फुकाउन अब केहीले छेक्दैन – निधिले भनेका छन् ।

पुस ११ गतेको केन्द्रीय कार्य समिति बैठकले एकपक्षीय रुपमा महाधिवेशनको कार्यतालिका , कार्यविधि, तरुण दलको म्याद थप र क्रियाशील सदस्यता सम्वन्धी विधानका केही दफा निलम्बन गर्ने निर्णय गरको थियो । त्यसपछि कांग्रेस भित्र ठूलै समस्या र खैलाबैला भएको हो ।