अग्नि सापकोटालाई सशर्त सभामुख बनाउन प्रम ओली सहमत

५ माघ, काठमाडौं । नेपाल कम्युनिष्ट पार्टीका प्रभावशाली नेता हरिबोल गजुरेलले नयाँ सभामुखका लागि पार्टी नेता अग्निप्रसाद सापकोटा नै उपयुक्त उम्मेदवार रहेको दावी गरेका छन् ।

नेपालबहस डटकमसँगको छोटो कुरामा उनले आज बिहान प्रधानमन्त्री केपी ओली र अध्यक्ष पुष्पकमल दाहालबीच सापकोटालाई नै सभामुख बनाउने सहमति भएको दावी उनले गरेका छन् । दुबै नेताबीच यसबारे सहमति भएकाले अब विवाद गर्नुपर्ने कुुनै कारण नरहेको पनि उनले स्पष्ट गरेका छन् । दुबै अध्यक्षबाट सापकोटालाई नै सभामुख बनाउने सहमति भएपछि त्यसलाई औपचारिकता दिन साँझ ४ बजे सचिवालय बैठक बोलाइएको हो – उनले भने ।

एकाएक प्रधानमन्त्री समेत रहेका ओली सापकोटाको नाममा त्यसै लचक देखिएका भने होइनन् । स्रोत भन्छ– आज बिहान मात्रै सभामुखको प्रकरणले नयाँ रुप लिएको हो । ओलीका तर्फबाट प्रस्तावित सुभाषचन्द्र नेम्बाङले बिहान दुबै अध्यक्षसँग भेट गरी आफू विवादमा परेर सभामुख नबन्ने बताएका थिए ।

यद्यपि नेम्बाङले हिजो र अस्ति पनि प्रधानमन्त्री ओलीसँग अब आफूलाई सभामुखका लागि प्रस्ताव नगरिदिन आग्रह गरेका थिए । त्यसपछि ओली पनि सहमत भएका हुन् । स्रोत भन्छ – आज बिहान दुई अध्यक्षबीच सापकोटालाई सभामुख बनाउने तर सरकारलाई पूर्ण सहयोग गर्नुपर्ने शर्त ओलीले राखेका थिए ।

उनले घुमाउरो पारामा अमेरिकी सहयोग मिलेनियम च्यालेञ्ज कर्पाेरेशन एमसीसीलाई संसदबाट सहजै अनुमोदन गराउन नयाँ सभामुखले सहयोगी भूमिका खेल्नुपर्ने शर्त राखेका थिए । त्यसमा प्रचण्डले सहमति जनाएपछि सापकोटालाई सभामुख बनाउन ओली तयार भएको बुझाई स्रोतको रहेको छ ।