बेल्जियमकी राजकुमारी नेपालमा

५ माघ, काठमाडौं । नेपाल भ्रमण वर्ष २०२० सुरु भएसँगै बेल्जियमकी राजकुमारी आष्ट्रिड नेपालको साताव्यापी भ्रमणका क्रममा आज काठमाडौं आइपुगेकी छन् । बेल्जियमका राजा फिलिपकी बहिनी राजकुमारी आष्ट्रिडलाई त्रिभुवन अन्तराष्ट्रिय विमानस्थलमा संघीय सरकारका वाणिज्य तथा आपूर्ति मन्त्री मोतीलाल दुगडले स्वागत गरेका छन् ।

भ्रमणका क्रममा राजकुमारी काठमाडौंका अतिरिक्त कैलाली, नवलपरासी र चितवनसमेत जाने कार्यक्रम रहेको परराष्ट्र मन्त्रालयले जनाएको छ । उनी नेपालमा क्षयरोग नियन्त्रण गर्न सक्रिय गैरसरकारी संस्थासँगको आबद्धतामा नेपाल आएकी हुन् । साथै नेपाल भ्रमणका क्रममा राजकुमारी आष्ट्रिडले राजनीतिक भेटघाटसमेत गर्ने परराष्ट्रले जनाएको छ ।

राष्ट्रपति विद्यादेवी भण्डारी, उपप्रधान एवं रक्षामन्त्री ईश्वर पोख्रेल , परराष्ट्रमन्त्री प्रदीपकुमार ज्ञवाली र स्वास्थमन्त्री भानुभक्त ढकालसँग भेट गर्ने उनको कार्यक्रम तय भएको छ । राजकुमारी आष्ट्रिड माघ ११ गते स्वदेश फर्कने कार्यक्रम रहेको छ ।