निर्माण व्यवसायीहरुको उपकरण जलाइएकोमा महासंघको कडा आपत्ति, दोषीलाई कार्वाहीको माग

६ माघ, काठमाडौं । देशका विभिन्न ठाउँमा निर्माण व्यवसायीहरुको उपकरण जलाइएकोमा नेपाल निर्माण व्यवसायी महासंघले कडा आपत्ति जनाउँदै घटनाको भत्सर्ना गरेको छ । अज्ञात समुहले मोरङ जिल्लाको मिक्लाजुङ गाउँपालिका अन्र्तगत आइतबारेमा तीन वटा एस्क्साभेटरमा आगजनी गर्दा ३ करोड ५० लाख रुपैया भन्दा बढीको क्षति भएको महासंघले जनाएको छ ।

किसानचोक–रमिते–आइतबारे–टाँडी सडक खण्ड निर्माणमा प्रयोग भइरहेको शर्मा–भिमेश्वर जेभी कम्पनीको एक्साभेटरमा आगजनी गरिएको महासंघद्धारा सोमबार जारी विज्ञप्तिमा उल्लेख छ । त्यस्तै झापा जिल्लाको सेतुमारीमा पनि अज्ञात समुहले शर्मा एण्ड कम्पनीको स्वामित्वमा रहेको एउटा एस्काभेटर र ब्याक्हो लोडरमा आगजनी गरेको महासंघले जनाएको छ । आगलागीका कारण बा ३ क ३४४ नम्बरको पूर्ण नष्ट भएको छ भने बा २ क ९४४५ नम्बरको ब्याकहोइ लोडरमा पनि आंशिक क्षति पुगेको छ महासंघको विज्ञप्तिमा जनाइएको छ ।

आगजनीका यी घटनाको आवश्यक छानविन गर्दै दोषीलाई पत्ता लगाई कडा भन्दा कडा कारवाही गरी आगजनीबाट सम्बन्धीत निर्माण कम्पनीलाई भएको नोक्सानीको नेपाल सरकारबाट उचित क्षतिपूतिको व्यवस्था मिलाइदिन महासंघले अनुरोध गरेको छ । यस्ता घटनामा संलग्नलाई तत्काल पक्राउ गरी कडा भन्दा कडा कार्वाही नगरिएमा महासंघ देशव्यापी रुपमा शशक्त आन्दोलन सुरु गर्न बाध्य हुने महासंघका महासचिव रोशन दाहालद्धारा जारी विज्ञप्तिमा उल्लेख छ । अवका दिनहरुमा यस्तो अपराधिक घटना दोहोरिन नदिन र सामाजिक शान्ति सुरक्षा कायम राख्न आवश्यक पहलका लागि समेत नेपाल सरकारसँग महासंघले अनुरोध गरेको छ ।