ओली र मोदीले गरे इसीपीको संयुक्त उद्घाटन

७ माघ, काठमाडौं । वहुप्रचारित नेपाल-भारत सीमाको एकीकृत भन्सार चौकी आजबाट पूर्वको विराटनरमा सञ्चालनमा आएको छ । उक्त एकीकृत भन्सार चौकीको आज प्रधानमन्त्री केपी ओली र उनका भारतीय समकक्षी नरेन्द्र मोदीले आज संयुक्त रुपमा भिडियो कन्फरेन्समार्फत उद्घाटन गरेका हुन् ।

प्रधानमन्त्री ओलीले काठमाडौं र मोदीले नयाँ दिल्लीस्थित हैदरा हाउसबाट संयुक्त रुपमा उक्त इन्टिग्रेटेड चेक प्वाइन्टको उद्घाटन गरेका हुन् । दुबै मुलुकले संयुक्त रुपमा चेक जाँच गर्ने यो भन्सार चौकी व्यापार प्रवद्र्धनका लागि उपयोगी हुने विश्वास लिइएको छ ।

साथै एकैपटक चेक जाँच हुने भएकाले व्यापारी र कर्मचारी दुबैलाई सहज हुने छ । यसबाट हाल सीमावर्ती जोगबनी भन्सार क्षेत्रमा हुने लामो लाइन हट्ने र काममा समेत छिटो हुने बताइन्छ । भिडियो कन्फरेन्सका क्रममा प्रधानमन्त्री ओलीले समकक्षी मोदीलाई नेपाल भ्रमणको निम्तो समेत दिए । मोदीले पनि उपयुक्त समयमा भ्रमण गर्ने आश्वासन दिए ।