सुरक्षा दिन सरकार असफल

८ माघ काठमाडौं । सुरक्षा दिन सरकार असफल भएको हुदा मुलुक भित्र निर्माण व्यवसायीहरुले काम गर्ने वातावरण नभएको आरोप नेपाल निर्माण व्यवसायी महासंघले लगाएको छ ।

हालै सम्पन्न महासंघको २१ औं साधारण सभा तथा नेपाल बिल्डटेक एक्स्पोका बारेमा जानकारी दिन बुधवार आयोजित पत्रकार सम्मेलनमा नेपाल निर्माण व्यवसायी महासंघका अध्यक्ष रवि सिंहले
राज्यले निर्माण व्यवसायी र उनीहरुका उपकरणलाई सुरक्षाको प्रत्याभूति दिन नसकेकाले काम गर्ने वातावरण नरहेको बताए ।

विगत ३–४ महिनाको अवधिमा व्यवसायीका करीब २० करोड भन्दा बढीको उपकरणमा आगजनी गरिएको छ अध्यक्ष सिंहले उल्लेख गरे । महासंघको २१ औं साधारण सभाले ३० बुँदे घोषणा पत्र जारी गर्दै पूर्वाधार मैत्री नीतिगत व्यवस्थाले मात्र विकास निर्माणलाई प्रभावकारी कार्यान्वयन गर्न सकिने ठहर गरेको महासंघका महासचिव रोशन दाहालले बताए ।

घोषणापत्रलाई नेपाल सरकारसँग सहकार्य गरी संशोधन गर्नुपर्ने नीतिगत कार्यहरु, भ्याट तथा राजश्व, प्रतिवद्धता कार्यान्वयन, व्यवसायीक प्रवद्र्धन र अन्तर्राष्ट्रिय सम्बन्धको विकास तथा व्यवसायीक सुदृढिकरण सम्बन्धी लगायतका बुँदाहरुमा समेटिएको छ ।

महासंघको साधारण सभा सँगसँगै महासंघ, भौतिक पूर्वाधार तथा यातायात मन्त्रालय, निर्माण व्यवसाय विकास परिषद् र इन्नो रेग इण्डियाको संयुक्त आयोजनामा सम्पन्न नेपाल बिल्डटेक एक्स्पो २०२० करीब ५ हजारले अवलोकन गरेको महासंघले जनाएको छ । महासंघले आफ्नो इतिहासमा पहिलो पटक आयोजना गरेको यस एस्क्पोमा करिब २ अर्ब बराबरको प्रतिवद्घता सहितको कारोबार भएको पत्रकार सम्मेलनमा जानकारी दिइयो ।