भागबण्डामै मिल्ने भो कांग्रेसको विवाद

१० माघ काठमाडौं । अन्ततः नेपाली कांग्रेस भित्रको झगडा भागबण्डामै सामसुम हुने संकेत मिलेको छ । आज अपरान्ह् पार्टी सभापति शेरबहादुर देउवा निवास बुढानिलकण्ठमा हुने छलफलमा दुबै पक्षले भागबण्डा मिलाएर सहमति गर्ने तयारी गरेका छन् ।

यस प्रयोजनका लागि हिजो साँझ महामन्त्री डा. शशांक कोइरालाको महाराजगञ्जस्थित निवासमा असन्तुष्ट पक्षका नेताहरु छलफलमा जुटेका थिए । गत पुस ११ गते संस्थापन पक्षले बहुमतको आधारमा एकलौटी रुपमा महाधिवेशनको कार्यतालिका लगायत विधानको धारा निलम्बन र विभाग संख्या बढाउने निर्णय गरेको थियो ।

सो निर्णय विरुद्ध रामचन्द्र पौडेल र कृष्णप्रसाद सिटौला पक्षले असहमति जनाउँदै आफू पक्षीय जिल्ला सभापतिहरुलाई काठमाडौं बोलाएर देउवालाई दवाव दिएका थिए । सोही दवावले गर्दा देउवाले पूर्व निर्णय सच्याउने वचन दिएका थिए ।साथै विवाद समाधानका लागि उपसभापति बिमलेन्द्र निधि, पूर्व महामन्त्रीहरु प्रकाशमान सिंह र सिटौला बसेर धेरै विषयमा छलफल गरेका थिए ।

साथै अस्ति पनि देउवाले पौडेल र सिटौलालाई बोलाएर सहमतिको मस्यौदा तयार गर्न आग्रह गरे बमोजिम आज पुनः बैठक बस्न लागेको हो । आजको बैठकले भने समस्याको गाँठो फुकाउने विश्वास दुबै पक्षले गरेका छन् ।

तर त्यसको आधार भने पुनः भागबण्डा नै हुने भएको छ – एकजना केन्द्रीय सदस्यले भने । अहिले बुढानिलकण्ठमा छलफल भइरहेको छ – उनले भने । आजको छलफलमा देउवा, पौडेल, सिटौलाका साथै निधि , सिंह पनि सहभागी छन् ।