प्याकुरेललाई नैतिक संकट, राष्ट्रपतिको सल्लाहकारबाट गरे राजीनामा

१० माघ, काठमाडौं । सभामुख पदमा अग्निप्रसाद सापकोटा चुनिने लगभग निश्चित भएपछि उनी विरुद्ध सर्वाेच्चमा कर्तव्य ज्यान सम्बन्धी उजुरी गर्ने अधिकारकर्मी सुशील प्याकुरेललाई एक साता ठूलै संकट प¥यो ।

आफू सम्वद्ध दल नेकपाले सापकोटालाई सभामुखको उमेदवार बनाएपछि प्याकुरेलले नैतिकताको प्रश्नमा धेरै घोत्लिनु प¥यो । अन्ततः आज शुक्रबार उनले राष्ट्रपति विद्यादेवी भण्डारीको विज्ञ सल्लाहकार पदबाट राजीनामा गरे ।

०७४ चैतमा विज्ञ सल्लाहकारका रुपमा नियुक्त प्याकुरेल राष्ट्रिय मानव अधिकार आयोगका सदस्य रहिसकेका छन् । उनले काभ्रेका अर्जुन लामाको अपहरण गरी हत्या गर्ने मुख्य अभियुक्तका रुपमा सापकोटा रहेको भन्दै सर्वाेच्च अदालतमा मुद्धा दायर गरेका थिए ।

अहिले तिनै सापकोटालाई नेकपाले सभामुखको उमेदवार बनाएको छ । साथै प्रमुख प्रतिपक्षी दल नेपाली काँग्रेसले समेत सापकोटालाई चुनौती दिएन । जसले गर्दा सापकोटा सभामुख चयन हुनेमा कुनै शंका रहेन ।

पर्सि माघ १२ गते सभामुखको औपचारिक घोषणा हुने छ । यही मुद्धाले गर्दा प्याकुरेललाई नैतिक संकट परेको थियो । उनले आजैबाट विज्ञ सल्लाहकार पदबाट राजीनामा गरेपनि स्वीकृत भने भइसकेको छैन । राजीनामा पत्रमा प्याकुरेलले कानूनी सर्वाच्चताको सम्मानका लागि आफूले राजीनामा गरेको प्रसंग उल्लेख गरेका छन् ।