गायिका राउत प्रहरी नियन्त्रणमा

१३ माघ, काठमाडौं । महानरीगय प्रहरी परिसर काठमाडौंले आज बिहान गायिका आस्था राउतलाई नियन्त्रणमा लिएको छ । त्रिभुवन अन्तराष्ट्रिय विमानस्थलको आन्तरिक टर्मिनलमा सुरक्षा जाँचको क्रममा प्रहरी र राउतबीच भएको विवाद सार्वजनिक भएको थियो ।

सो विवाद पछि महिला प्रहरी कर्मचारीले अभद्र व्यवहारको निवेदन दिएकी थिइन् । त्यस पछि प्रहरीले पक्राउ गर्न जिल्ला प्रहरी कार्यालयसँग पकाउ पुर्जी जारी गर्न माग गरेको थियो । अभद्र व्यवहार सम्बन्धी कसुरमा राउतविरुद्ध जिल्ला प्रशासन कार्यालय काठमाडौंले उनलाई पक्राउ गर्न प्रहीलाई अनुमति दिएको थियो । उनीविरुद्ध अभद्र व्यवहार सम्बन्धी कसुरमा मुद्दा चल्ने भएको छ ।

तर, आस्थाले भने सो दिन भएको विवाद आवेगको परिणाम भएको बताइसकेकी छिन् । उनले आफुले प्रहरीलाई नभई प्रहरीले आफुलाई अभद्र व्यवहार गरेको बताउँदै आएकी छिन् । प्रशासनले पक्राउ पुर्जी जारी गरेसँगै कानुनअनुसार राउत प्रहरीको फरार सूचीमा परेकी थिइन् । उनले आफू सांस्कृतिक कार्यक्रममा भारतको सिक्किममा रहेको र फर्कनेबित्तिकै प्रहरीलाई घटनाबारे जानकारी दिने बताएकी थिइन् । राउतलाई आफन्तले महानरीगय प्रहरी परिसर काठमाडौंमा सोमबार बिहान लगेपछि प्रहरीले नियन्त्रणमा लिएको छ ।

परिसर प्रवक्ता होबिन्द्र बोगटीका अनुसार गायिका राउत बिहानै टेकु पुगेपछि थप प्रक्रिया अगाडि बढाउनका लागि उनको आफन्तलाई पनि टेकु बोलाइएको छ । काठमाडौं जिल्ला प्रशासन कार्यालयले गायिका राउतविरुद्ध माघ ५ गते पक्राउ पुर्जी जारी गरेको थियाे । मुलुकी अपराध (संहिता) ऐन २०७४ को दफा १ सय १८ अनुसार अभद्र व्यवहार कसूरमा राउतविरुद्ध आइतबार पक्राउ पुर्जी जारी भएको थियाे ।