दानाबारी – राजदुवाली सडक कालोपत्रको शिलान्यास

१३ माघ, काठमाडौं । छ दशक अघि यातायात चल्न शुरु गरेको झापादेखि इलाम जोड्ने दानाबारी ( सुखानी ) –राजदुवाली ( इलाम ) सडक कालोपत्र हुने भएपछि स्थानीय हर्षित भएका छन् ।

प्रदेश सरकारको पहलमा सडक कालोपत्र हुने भएपछि स्थानीय हर्षित भएका हुन् । स्थानीय व्यवसायी सावित्रा ढकाल कालोपत्र सडक निर्माणपछि दानाबारी क्षेत्रले विकासमा फडर्को मार्ने आशा रहेको बताइन् । हिम्ङुङ्ग एण्ड थोकर कन्स्ट्रक्सन प्रालि धापासी काठमाडौँले रु ४५ करोड ४७ लाख १५ हजार ८१९ मा सडक निर्माणको ठेक्का पाएको छ । आगामी २०७९ असार मसान्तमा सम्पन्न गर्ने गरी सडक कालोपत्रको सम्झौता गरिएको छ ।

सात मिटर चौडा रहने कालोपत्र पहिलो चरणमा सुखानीदेखि लोदिया बगैचासेरोसम्म १४ दशमलव सात किलोमिटर सम्पन्न गरिने भौतिक पूर्वाधार विकास मन्त्रालय प्रदेश नम्बर १ का सचिव राजेश घिमिरेले जानकारी दिए । सडकको आज प्रदेशका आर्थिक मामिला तथा योजनामन्त्री इन्द्रबहादुर आङ्बोले शिलान्यास गरेपछि स्थानीयको मुहारमा खुशी छाएको हो । मन्त्री आङ्बोले विगतमा भएका राजनितिक अस्थिरताको शिकारमा परेको सडक आगामी ३० महिनामा सम्पन्न हुने बताए ।

नगर प्रमुख दीपककुमार थेवेले इलाम र झापा जोडने यो सडक मेरुदण्ड भएको बताए । बर्खाको समयमा हुने सास्तीबाट नगरवासी मुक्त हुने भन्दै उनले खुशी व्यक्त गरे । सडक कालोपत्र भएपछि इलामबाट झापा झर्नेका लागि सहज हुनेछ । सो बाटो हुँदै इलाम सदरमुकामबाट झापाको विर्तामोड पुग्न करिब ५३ किलोमिटर यात्रा गर्नुपर्ने हुन्छ ।