घोराही सिमेन्टको उत्पादन अनुमति रद्द

१३ माघ, काठमाडौं । सरकारले घोरासी सिमेन्टलाई ओपिसी सिमेन्ट उत्पादनको लागि दिएको इजाजत रद्द गरेको छ । गुणस्तर तथा नापतौल विभागले यो कम्पनीलाई दिएको इजाजत २ महिनाका लागि रद्द गरिदिएको हो ।

कम्पनीले पीपीसी सिमेन्ट भने उत्पादन गर्न सक्ने विभागले जनाएको छ । विभागका अनुसार नमुना परीक्षणका क्रममा कम्पनीबाट उत्पादित सिमेन्टमा आइआरको मात्रा तोकिएभन्दा अत्याधिक धेरै भेटिएको छ।

विभागले दुई महिनापछि कम्पनीको फेरि अनुगमन गर्ने र सुधार देखिए उत्पादन अनुमति दिनसक्ने पनि जनाएको छ। विभागको निर्णयसँगै अब कम्पनीले सगरमाथा ओपीसी सिमेन्ट उत्पादन गर्न पाउँदैन ।