रौतहटमा गोली चल्यो, भारतीय नागरिक प्रहरीको नियन्त्रणमा

१५ माघ, काठमाडौं । रौतहटको भारतीय सीमा क्षेत्रमा गएराति प्रहरी गस्ती टोली र भारतीय अपराधीबीच दोहरो भिडन्त भएको छ ।

भिडन्तमा प्रहरीको गोली लागेर घाईते भएका एकजना मोस्टवान्टेड भारतीय अपराधीलाई प्रहरी गस्ती टोलीले नियन्त्रणमा लिन सफल लिएको छ । जिल्लाको दक्षिणी भेग तथा भारत कुण्डवा चैनपुर थाना क्षेत्रको सामुन्ने पर्ने इशनाथ नगरपालिका–१ बन्जरास्थित नेपाल–भारत सीमासँग जोडिएको बकैया नदीको बाँधमा भारतीय अपराधी र प्रहरी गस्ती टोलीबीच गोली हानाहान भएको थियो ।

गोली हानाहानमा भारत, बिहार मोतिहारी कुण्डवा चैनपुर थानाक्षेत्र अन्तर्गत जटौलिया ग्राम पन्चायत वडा नं। ४ का शेख चाँद अलीको दाहिने खुट्टामा गोली लागेर घाइते भएको जिल्ला प्रहरी रौतहटका प्रहरी प्रमुख एसपी रविराज खड्काले जानकारी दिएका छन् ।

राति १२ बजेको समयमा प्रहरी गस्ती टोली र अपराधी समूहबीच जम्काभेट हुँदा अपराधी समूहको तर्फबाट गोली चलाएपछि प्रहरीको जवाफी कारवाहीमा मोस्टवान्टेड भनिएका शेख चाँदको खुट्टामा गोली लागेको हो ।

गत पुस ९ गते ईशनाथ नगरपालिकाको कार्यालयमा बम, गत पुस ६ गते ईशनाथ–४ मा रामअवध सिंहको मदिरा पसलमा बम र गत मंसिर २१ गते राजपुर नगरपालिका–७ स्थित चौधरी ईटा भट्टामा आफ्नै समूहले बम राखेको चाँद अलीले स्विकारेको जिल्ला प्रहरी प्रवक्ता डिएसपी नविन कार्कीले बताएका छन् ।

उक्त समूह लामो समयदेखि रौतहटका विभिन्न पालिकाका जनप्रतिनिधि, कर्मचारी, ब्यापारी लगायतलाई थर्काएर पटक पटक चन्दा संकलन गर्दै आएको प्रहरीको अनुसन्धानबाट खुलेको छ । भारतीय अपराधी चाँद अली समूहमाथि यसअघि नै विभिन्न अपराधमा संलग्न रहेको आरोपमा चारवटा मुद्दा दर्ता रहेको जिल्ला प्रहरी कार्यालय रौतहटले जनाएको छ ।